Uuttuutinik taarsersuineq artukkiivoq
Ajornartorsiut tamanna pillugu Qeqertarsuatsiaani innuttaasoq Priscilla Boye ima oqarpoq:
- Imatut saaffigineqarpunga: Qamitaalerpugut, akissarsiakka tamaasa akiliutigilerpakka, sinnerlugit. Meeqqakka qanoq isiussavakka. Inuussutissaqanngillat, Priscilla Boye Nuup Kommunalbestyrelsiani ilaasortaasoq aallartippoq, nangillunilu:
- Paasitinneqanngilagut tamavitta taamatut akiliuteqassasugut, oqarpoq.
Nukissiorfiit oqarsimanerarpaat målerit peerneqarneranni iluani paasissutissat saqqummersut malillugit atuisut akiligassinneqartut. Ilai 10.000 koruunit tungaanut akiligassaqalersimapput, taakkua peerneqarnerani. Soorunami uissuummerrapput. Taamatut pineqarnerput uagut tamatta kusaginngeqaarput, Priscilla Boye oqarpoq.
Nukissiorfiit nalunaarutigaat innaallagissamut atuinermut uuttortaatinik taarsersuineq Nukissiorfiit akiligassarigaat atuisuunngitsulli.
- Innuttaasut atuinermik saniatigut akiligassinneqarsimagunik taannaasimassaaq Nukissiorfiit uuttortaatinik taarsersuinerminni uuttortaatitoqqani atuinermut nalunaarsukkat atuisimanerunermut nalunaarsuutaat, taama oqarpoq, Nukissiorfinni aningaasaqarnermut pisortaq Karsten Stounberg.
-Kisianni inuit ataasiakkaat akiligassaat 10.000 koruunit ataallugit angissuseqarput. Nuummi ungasianiit atuisimanermik atuaasarnerup atuutilerneratigut immikkut ittumik ukiumoortumik akiligassinneqartarneq pisarunnaassaaq. Innaallagiarli atugarisimaneq kisivimmi akilerneqartalissalluni, Karsten Stounberg erseqqissaavoq.
Nukissiorfiit innaallagissamut atuinermut uuttortaatit 6.700-it Nuup Kommuniani ungasianiit atuisimanermik atuaassutinik taarsersorsimalerpaat. Taakkua innuttaasut 60 procenteraat.
