Uummannaq pillugu frimærkiliami naqinnerni kukkuneqarnera POST-ip ajuusaarutigaa
Frimærkimi illoqarfiup allassimanerani ”M”-i ataaseq amigaataavoq, taamaalilluni Uummannaq kukkullugu ”Uumannaq”-mik allassimalluni.
Frimærki ulloq 11. juni 2013 saqqummertussaammat frimærkinik nioqqutilinnut nunarsuartinnilu tamarmi agentinut nassiunneqareerpoq. Frimærki taamaammat ajoraluartumik utertinneqarsinnaanngilaq iluarsisamillu naqeqqillugu.
- Uummammap nalliuttorsiorneranut atasumik frimærkip kukkusumik allassimalluni saqqummernera assorsuaq ajuusaarutigaara, frimærkinut pisortaq Allan Pertti Frandsen oqarpoq.
POST-ip iluani kukkunersiuereerluni akuersinermut malitassat tamarmik naak malinneqarsimagaluartut, taamaattoq kukkuneq pisimasoq taassuma nalunaarutigaa.
- Suliaq ilungersunartutut isigaara. Taamaammat POST Greenlandip siunissami frimærkiliaanik tamanik akuersisoqarnissaanut malitassat nalilersoqqinneqassapput allanngortinneqarlutillu taamatut pisoqaqqinnginnissaa qulakkeerniarlugu, Allan Pertti Frandsen erseqqissaavoq.