Uummannap Ilulissallu akornanni aqqummik nassaarput

Uummannap Ilulissallu akornanni qimussit aqqutaannik nassaarniarluni qimussimik ilisimasasarsiortut Ilulissanut maanna tikingajalerput, Sermitsiaq nittartakkamini taama allaaserisaqarpoq.

Uummannamiit Ilulissat tungaannut aqqut takisoorsuaq maanna naammassingajalerpoq, ilisimasassarsiortut ingerlatsisuat, Ole Jørgen Hammeken, oqarasuaammik satellitsikkoortumik sermersuarmiit oqaluttuarpoq.

Qimussersut pingasut Ilulissaneersut, Ole Thorleifsen, Ville Siegstad aamma Niels Magnussen, Ole Jørgen Hammekenip ullumi naapippai.

- Ornitatsinnut tikingajalernerput paasillugu tamanna uannut ajugaasimaarnaqaaq. Uummannamiit Ilulissat tungaannut qimussit aqqutaannik nassaarpugut, Ole Jørgen Hammeken oqaluttuarpoq.

Ilisimasassarsiortut Ilulissanut ullumikkut apuuttussaagaluarput, silalli ilaatigut pitsaavallaartannginnera pissutigalugu naatsorsuutigisamit piffissaq sivisunerusoq atorneqarpoq. Qimussillu Ilulissanut aqagu tikissapput.

Peqataapput inuit arfineq pingasut, filmiliortartoq franskeq aamma ilaalluni. Qimussernersuaq franskip taassuma filmiliaraa, filmilianilu Frankrigimi Canadamilu TV-qarfinnut suliaraa. Qimussit sisamaapput, qimmit 60-iullutik.