Uummannamut nunaqarfiinullu attavik ajoquteqarpoq
Nutaarsiassat kingulliit:
Uummannami nunaqarfiinilu attaveqartoqaqqilerpoq. Uummannamut nunaqarfiinullu attaviit tamarmik nal. 15:10 atoqqilerput.
- TELE-POST-ip teknikeria Uummannamut apuuppoq nal. marlup missaani, akunnerullu affaa qaangiutiinnartoq sinerissami radioqarfimmut, timmisartut radioinut aammalu qarasaasiakkut attaveqaatit amerlanersaannut attaviit Uummannami atorsinnaanngoqqipput.
Akunnerup aappaata qeqqata ingerlanerani teknikerip Uummannami taassumalu nunaqarfiini tamani attaveqarnerit atoqqissinnaanngornerat nalunaarutigisinnaalerpaa.
Taavani atortuni fiberitigut attaveqaatinik suliarinnittuni teknikkikkut ajoquteqartoqarnera attaveerunnermut pissutaavoq.
Allattoq Simon Uldum -
maajip 27-at 2013 10:04
Ullumi nal. 9:02 Uummannami teknikkikkut ajoquteqarnerup illoqarfimmut nunaqarfiinullu attavippassuit kipitippai. TELE-POST tusagassiorfinnut nalunaaruteqarluni taama allappoq.
Ajoqut ilaatigut sinerissami radiomik, telefonimik nalinginnaasumik internetimillu eqquivoq. KNR FM –TV-lu Uummannami nunaqarfittaanilu atorsinnaapput, taamatullu 3G.
Teknikeri aaqqissuussiartortoq Uummannamut aallareerpoq, ullumikkullu nal. 14:05 Uummannamut tikinnissaa naatsorsuutigineqarluni.
- Uummannami eqqaanilu tamatuma sullitatsinnut ajoqusersuutaasimanissaa TELE-POST-ip ajuusaarutigaa, TELE-POST-imi Attaveqaqatigiinnermut pisortaq, tusagassiorfinnut nalunaaruteqarluni taama alappoq.
