Uummannami Pituffimmilu ataatsimiisitsineqarpoq

Namminersorneq pillugu innuttaasunik ataatsimiisitsinerit nangillugit nunatta avannaa maanna paasisitsiniaavigineqarpoq. Uummannami unnugu Edvard Krusep atuarfianni aulami, nal. 19.30 ataatsimiititsisoqassaaq.
Allattoq Najaaraq Egede
septembarip 07-at 2008 13:26

Atorfilittat politikerillu saqqummiussissussat tassaapput Hans Enoksen - Siumut, Kuupik Kleist - Inuit Ataqatigiit, Jensine Berthelsen - Atassut, Jens B. Frederiksenilu - Demokraatineersoq. Tusarnaariat apeqquteqarsinnaassapput.

Uummannami ataatsimiinneq kalaallisut ingerlanneqassaaq toqqaannartumillu KNR-ikkut nuna tamakkerlugu aallakaatinneqassalluni.

Pituffimmi namminersorneq pillugu aamma ullumi nal.14.00 kalaallisut ingerlanneqartumik ataatsimiititsisoqarpoq, unnugu nal. 19.30 danskisut ingerlanneqartussamik.

Politikerit Pituffimmi peqataasut tassaapput: Tommy Marø - Siumut, Ane Hansen - Inuit Ataqatigiit, Kristian Jerimiassen - Atassut, J.O. Nyboelu - Demokraatineersoq.

Namminersorneq pillugu paasititsiniaanerit nangillugit Uummannap pigisaani Ikerasanni Ikerasaap atuarfiani innuttaasunik ataatsimiisitsineq aqagu ataasinngorneq 8. september 2008 nal. sisamanut (16.00) pissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq