Uummannami peqqissaavik nakorsanik peqqissaasunillu paarlatsinik taarserartunik ajornartorsiuteqartoq
Nakorsat peqqissaasullu paarlatsit qallunaat Uummannap peqqissaavianut ukiumut arlallit suliartortarput.
Nakorsaq Carsten Mikkelsen nakorsatut paarlatsitut 2008-mili sulisarpoq, ukiunilu qulingiluangajanni illoqarfinni assigiinngitsuni paarlattaasarluni.
-Napparsimasup peqqissinissaa ataatsimoorluta anguniagaraarput. Ataatsimoorluta suleqatigiinnerput Uummannami pitsaasorujussuuvoq.
Uummannap peqqissaaviani nakorsat qallunaat marluupput, peqqissaasut sisamat, isumaginninnermi peqqissutsimullu ikiortit sisamat.
Saniatigullu Danmarkimiit nakorsanngorniat marluk sulillutik.
Peqqissaanermi ikiortit kalaallit sisamat aalajangersimasumik atorfeqarput, taakkulu saniatigut ilinniarsimanngitsunik ikiorteqarluni.
Ataavartumik sulisoqalernissaa kissaatigineqartoq
Nakorsat peqqissaasullu kalaallit atorfillit amigaataasut peqqissaasup Helle Mølstrømip nassuiaatigaa.
- Maani sulisut amerlanersaat qallunaajupput. Taamaattumik kalaallinik peqqissaasunik aalajangersimasunilluunniit sulisunik amerlanerusunik atorfinitsitsisoqassagaluarpat pitsaassagaluarpoq. Kisianni aalajangersimasumik sulisut maanna atorfeqartut pikkorissorujussuupput.
Nakorsiartut ilaat qallunaatut oqalussinnaanngillat ilaannilu nutserisoqarniarneq ajornarsinnaasarpoq, tamannali nakorsap Carsten Mikkelsenip nakorsiartut timaat atorlugu, ussersornikkut attaveqatigisarpai.
- Oqaatsit atunngikkaluarlugit attaveqatigiittarnerup qanoq pingaaruteqartiginera paasinikuuara. Taamaattumik napparsimasup qanoq inneranik naliliininni timi atorlugu attaveqatigiinneq aamma oqaatsit atorneratulli pingaartippara.
Larsine Jakobsen Uummannami peqqissaavimmi peeqqissaanermi 2019-mili ikiortiuvoq, paarlatsinillu suleqateqarneq sungiussimavaa.
- Aallaqqaammut ippingiatornarpoq sulileqqaajulluni suleqatit taarseraannaavittut, naggataani ilikkarnartorujuuvoq piffissaq sivikitsoq ilagiinnarniarlugit.
Helle Mølstrømillu ataavartumik sulisut nersualaarpai. Ataavartumik sulisut ukiumut 30-40-riarlutik sulisunik nutaanik tikilluaqqusisarput inuulluaqqusisarlutillu, tamannalu assut pitsaasumik ingerlakkaat Helle isumaqarpoq.
Nakorsiartunut sunniuteqarsinnaasoq
Helle Mølstrømip oqarnera naapertorlugu nakorsat peqqissaasullu qallunaat sapaatit akunneri pingasukkaarlugit ilaannilu qaammatit pingasukkaarlugit tikittarput aammalu peqqissaasut qaammatit pingasut sinnerlugit Uummannamiissinnaasarlutik.
Tamannalu nakorsiartunut sunniuteqarsinnaasarpoq.
- Soorunami aalajangersimasumik nakorsaqannginneq innuttaasunut sunniuteqartarpoq, napparsimanerit ataavartumik malinnaaffigineqarsinnaanngillat. Taamaattumik aallaqqaataaneertarnerit akulikipput, Helle Mølstrøm oqarpoq.
Carsten Mikkelsenillu peqqissaasup oqaasia ilaliinnarpaa.
- Nappaatinik sivisuumik atuuttunik timip nammineq illersornissamut atortuinut attuumassuteqartunik napparsimasoqarpugut. Taamaattumik napparsimasut aalajangersimasumik nakorsaqarnissaat pingaaruteqarpoq, katsorsaanermi ingerlaavartumik malinnaasoqarsinnaaniassammat, tamannalu Uummannami ajornakusoorpoq.
Uummannamiinnertik nuannarigaat
Peqqissaasoq Helle Mølstrøm Uummannap peqqissaavianut paarlattaajartorluni 2014-mili suliartortarpoq, peqqissaavimmilu 2019-imiit 2024-p tungaanut ataavartumik sulivoq.
Peqqissaasullu uia aamma Uummannamiippoq, Uummannamiinnertillu nuannaraat.
-Tikilluaqqusaaneq nuannaarnerlu misigiuaannarpakka. Inuit taama ilassilluarlutillu tikilluaqqusarmannga attortittarpunga, taamaammanuna uteqqittuaannartunga.
Nakorsap peqqissaasoq isumaqatigaa.
- Uangattaaq taama misigivunga. Kalaallit eqqarsartariaasiat, tarnikkut peqqissutsimik paasinnittariaasiat kiisalu nappaatinut tamakkiisumik isiginnittariaasiat paasisaqarfigalugillu ilinniarfigingaatsiarpakka. Kalaallit Nunaanniikkaangama tamatigut ilikkagaqartarpunga, peqqinnissaqarfimmi Danmarkimiit allaanerusumik ingerlavoq, Carsten Mikkelsen oqarpoq.
Nakorsat peqqissaasullu allanngoraannaavikkaluartut Larsine Jakobsenip aamma iluaqutissartaqarnerarpaa.
- Tassa kammattaartorujussuarpugut, ukiut qassit suleqatigereeraluarlugit suli massakkumut attavigisarpagut.
