Uummannami innuttaasut qummoroortaatinik tuniniaaneq naammaginngikkaat
Uummannami innuttaasorpassuit illoqarfimmi qummoroortaatinik tuniniaaneq naammaginngilaat.
- Pisinniarfimmi akileriarlugit taavunga arsaattarfimmut namminneerlutik aasarsimavaat, Uummannami pisinniarfinni siunnersuisoqatigiit siulittaasuat, Jakob Kruse oqarpoq.
Arsaattarfimmut illoqarfiup avataata tungaaniittumut aqqut qulleqanngimmat qimmeqarfiummallu qummoroortaatinik aallertorpassuit annilaangasartut taassuma oqaatigaa.
Qummoroortaatisianillu illoqarfimmi tigusisinnaalernissamut atsiortitsisoqarpoq, innuttaasullu 105-it sisamanngormat atsiorsimapput.
Illoqarfimmilu qummoroortartunik pisiortortitsisumi Pilersuisumi pisortap, Finn Fabriciusip, qummoroortartut pineqartillugit isumannaatsumik aqutsisoqarniartoq paasisinnaagaluarlugu qummoroortartunik Uummannami toqqorsinermut illoqarfimmi upalungaarsimanermut inspektørimit piumasarineqartut paasiuminaatsippai.
- Uagutsinnut Uummannami qummoroortartunik tuniniaasunut piumasarineqartut paasiuminaalaarput. Sumiiffinni allani, soorlu Upernavimmi, umiarsualivimmi qummoroortaatinik tuniniaasinnaagaanni qummoroortaatinillu imalinnik containereqartitsisinnaagaanni, Uummannami sooq taamaaliortoqarsinnaanngila?, Finn Fabricius aperivoq.
Qummoroortartunik isumannaatsumik tuniniaasoqarnersoq illoqarfinni upalungaarsimanermut inspektørinit nalilersorneqartussaavoq.
Uummannamilu inspektøri inatsisit najoqqutaralugit iliuuseqaannarsimasoq, Qaasuitsup Kommuniata annaassiniartartutut Upalungaarsimasui e-mailikkut allapput.
Uummannamilu upalungaarsimanermut inspektøri Qaasuitsup Kommuniani upalungaarsimanermut pisortap tulliata, Daavi Løvstrømip, taperserpaa.
- Taassuma nammineerluni najorpaa, pissutsit qanoq isikkoqarneri nalunngilaa. Taavalu inatsisit piumasaqaatigineqartut aallaavigalugit aalajangernissaminut naliornissuteqanngikkuni aalajangernera sukumiinerusumik misissornagu taperserneqarsinnaavoq, Daavi Løvstrøm oqarpoq.
