Uummannami inissaqarniarneq ajornartorsiutaavoq – sulisussaqarniarnermullu unammillernarpoq
Nunatsinni inissaaleqineq takornartaanngilaq.
Ini A/S-ip kisitsisaatai ukioq manna apriilimeersut naapertorlugit, nunatsinni inuit 16.547-t inissarsiortutut allatsissimapput, inissarsiortunilu utaqqisut 3236-ullutik.
Uummannami innuttaasut 1400 missaanniipput.
Inissarsiortutullu allatsissimasut 256-iupput, inissarsiortunilu utaqqisut 74-iullutik.
Sulisoqarniarnermut ajornartorsiutaasoq
Inissaaleqineq inissaaleqisunut kisimi ajornartorsiutaanngilaq, suliffeqarfinnummi ajornartorsiutinik aamma pilersitsivoq.
Sineriammiit sulileraluartut ilaanneeriarlutik inissaaleqineq pissutigalugu suliunnaarsinnaasarput.
Tamanna Utoqqaat Illuanni Sorlaqarfimmi pisortap Makkak Hansenip nalaassimavaa.
-Sulisitserusukkaluarluta inissamik tunniussisinnaaneq ajornartorsiutaavoq. Tunniussiinnaavissinnaannginnatta kisianni naatsorsuutigisinnaagaluarpara sulisoqarneq aalaakkaasumik ingerlassappat inissaqartinneqarnissaat qujanakutsuussagaluarami.
Uummannami peqqissaanermi ikiortitut ilinniarsimasunik peqaraluartoq, avataaninngaanniit sulisussarsiulernermi inissaateqannginneq utoqqaat illuanni ajornartorsiutigaat.
-Maanngaanniit pissarsisinnaanngivissorutta avataaninngaanniit sulisussarsiussagutta inissaqartitsiniarneq taanna uatsinnut ajornakuusoortussarujussuuvoq, Makkak Hansen oqarpoq nangillunilu:
-Nunami aamma napatitseqataassagutta illoqarfimmi sulisoqarniarneq arlaatigut aaqqiivigineqartariaqaraluarami.
Naalakkersuisut inissianik sisamanik sanatitsisut
Naalakkersuisut Uummannami inissianik attartortittagassanik sisamanik sanasoqarnissaanut qinnuteqaat siorna akueraat, inissiallu ukiup tulliani atulernissaat naatsorsuutaavoq.
Uummannap immikkoortuani illuikkiap nalaani najugaqarfimmi inissianik sisamanik sanaartorfissanik piareersaapput. Tamanna Avannaata Kommuniani illoqarfimmi pilersaarusiortup Martin Meinckep uppernarsarpaa.
-I delområde 1500-A12 i Uummannaqs vestlige side forventes byggemodning af en række byggefelter at være færdiggjort i år, hvorefter byggefelterne kan tages i brug som enfamiliehuse og rækkehuse, som led i en fortætning i den eksisterende by.
-Uummannap kitaani sumiiffimmi 1500-A12-imi sanaartorfissat arlallit ukioq manna naammassinissaat naatsorsuutigineqarpoq, tamatumalu kingorna illoqarfiup maanna iluani sanaartukkanik akulikillileriffimmi ilaqutariinnut ataasiakkaanut illutut inissiatullu atorneqarsinnaalissapput.
Inatsisartut aningaasanut 2026-mi inatsisaat naapertorlugu, Namminersorlutik Oqartussat Uummannami inissianik sanaartornissamut 5 millionit koruunit atussavai.
Kommunalbestyrelsemiit aamma iliuuseqarniartut
Avannaata Kommuniani teknikkimut ataatsimiititaliami siulittaasup Sakio Fleischerip Uummannami inissaaleqineq ajornartorsiutinngorsimasoq naqissuserpaa.
-Uummannami inissaqarniarneq oqaatigilluaannarlugu ajornartorsiutigaarput annertuumik. Inissialiorneq annertuumik aningaasassaqarniarnikkullu eqqarsaatigalugu pilersinneqarsinnaaneri taakku uagut sulissutigerusullugit kommunalbestyrelsemi aamma qaqittarpagut.
Inissialiornissap ingerlaniarnera arriittoq Sakio Fleischerip oqaatigaa.
Inissialiornissamummi akit akisupput.
-Soorunami pilersaarusiornerit assigiinngitsut aamma sanaartornermi massakkut akit akisoorujussuugamik kvadratmeterimut taamaammat ilaatigut sanaartortoqartussaagaluarluni akit qaffasippallaarneri pissutigalugit kinguartinneqartariaqarnerat tassaniikkami aamma.
Naalakkersuisut sisamanik inissialiortitsinerisa saniatigut kommuni ataatsimik sanatitsinera naammaginanngitsoq Sakio Fleischer nassuerutigaa.
-Naammaginanngilaq, taamatut inissarsiortut amerlassusaat eqqarsaatigalugit, taama annikitsigisumik sanaartorneq.
Kommunalbestyrelsimili inissialiornissamut pilersaarusiartik novembarimi saqqummiutissallugu Sakio Fleischerip oqaatigaa.
- Pilersaarusiap taassuma qanoq isikkoqarnera taavalu aningaasalersuinissamut tunngasortaa aamma tassani sammineqassaaq.
