Uummannami eqqaanilu qaleralittassat 2000 tonsinik ilaneqarnissaat KNAPK-mit piumasarineqarpoq
Qalerallit akii appasipput taamattumillu aalisartut aningaasarsiornerat ilungersunartorsiorfiusarluni, KNAPK-p siulittaasua Leif Fontaine oqarpoq.
KNAPK-p immikkoortortaqarfii isumasioreerlugit, qalerallit 2000 tonsinik ilallugit, ukiup sinneranut pisassiissutigineqarpata naammassapput, Leif Fontaine oqarpoq. Uummannami aalisarneq massakkut unitsinneqarpat aalisartut aningaasarsiornerat eqqorneqartussaavoq, Leif Fontaine oqarpoq.
Qalerallit 5.000 tonsit aalisarneqarsimappata taava aalisarneq ingerlalluarsimassaaq, taamaattumik qaleralittassat 2000 tonsinik ilaneqarnissaat KNAPK-p naalakkersuisunut qinnutigivaat.
Sinerissap qanittuani saarullittassat 10.000 tonsit aalisarneqarsinnaanissaat KNAPK-mit piumasarineqarpoq, sinerissap qanittuani, kangerlunnilu saarullit amerlisimammata. Saarullit ukiormanna aalisarnissaannut pisassiissutigineqartut tamakkerlugit aalisarneqareerput.
