Uummammut aallartitsissut annaassereerpoq
Jens Kristian Andersen, Sisimiuni portøriusoq, oqaluttuarpoq, uummammut aallartitsissut ukiuni kingulerni marlunni marlussoriarluni atorneqartarsimasoq.
- Taanna pigisimanngikkutsigu inummik annaasaqarsimassagaluarpugut, Jens Kristian Andersen Qanoruumut ippassaq oqarpoq.
Nuummili, illoqarfiit pingaarnersaanni, ambulancet uummammut aallartitsissutik, pingaaruteqaqisunik, peqanngillat.
Nakorsaanerup Jesper Olesenip nassuerutigaa, ummammut aallartitamik peqarnissaq pingaaruteqarluinnartoq, inummillu annassinissamut ikiuutaalluinnassagaluartoq. Tassa arlaat uummalliulissagaluarpat minutsit sisamat ingerlaneranni ikiorneqarsinnaassagaluarmat.
- Nuuk illoqarfissuanngulersoq eqqumaffigaarput, tulleriiaarinerput aaqqissuussaanerpullu allanngortittariaqarnerlugu massakkut nalilersorparput, Jesper Olesen oqarpoq.
Inuit arlallit katersuuffigisartagaanni uummammik aallartitsissuteqarnissaq pingaartuuvoq, soorlu katersortarfinni timersortarfinnilu, Jesper Olesen isumaqarpoq.
