Uummalluttut pilertornerusumik nakorsarneqasinnaalersut

Qarasaasiakkut sullississut nutaaq nipi tusarsaanngitsoq (ultralyd, aaqq.) atorlugu misissukkat assinginik Dronning Ingridip Naparsimmavissuata Rigshospitalillu akornanni nassitsisinnaalerneq uummammikkut nappaatillit siunissami iluaqutigilissavaat. Tassami napparsimmaviit taakku marluk akornanni assinik misissuinerit assinginik pitsaasunik pilertornerusumik nassitsisoqarsinnaanngorpoq.

Suleriaaserlu iluaqutaareersoq, Dronning Ingridip Napparsimmavissuani nakorsaaneq oqaluttuarpoq. 

- Meerannguaq arlalialunnguanik qaammatilik uummammigut nappaataa inuuneranut navianaatilittut suussusersineqarpoq pilatsittariaqarlunilu. Dronning Ingridip Napparsimmavissuani nipi tusarsaanngitsoq atorlugu uummataa misissorneqarpoq (ekkokardiografi), assillu pilertortumik immikkut ilisimasalinnut Københavnimiittunut nassiunneqarlutik, Dronning Ingridip Napparsimmavissuani nakorsartittunut immikkoortortaqarfimmi nakorsaaneq Uka Wilhjelm Geisler Namminersorlutik Oqartussat tusagassiuutinut nalunaarutaanni oqaluttuarpoq.

- Assit misissorneqareermata saniatigut misissuinissaq pilaanissarlu- pinasuartumik angallassinissaq sioqqullugu pilersaarusiorneqarput. Meeraq sisamanngornerup tallimanngornerullu akornanni unnuakkut Rigshospitalimut apuunneqarpoq. Tallimanngornermi ullaakkut misissuinerit allat ingerlanneqarput arfininngornermilu ullaap tungaani suliaritippoq, maannamullu suut tamarmik ajunngitsumik ingerlallutik, Uka nangilluni oqaluttuarpoq.

Dronning Ingridip Napparsimmavissuata Qallunaallu Nunaanni napparsimmaviit suleqatigiinnerat pitsanngoriaateqarpoq.

- Siornatigut assinik uumassusilinnik nassitsiniarneq sivisunerusarmat, assillu ersernerluppallaartarmata, Qallunaat Nunaanni nakorsaanernit uummatikkut nappaatinik immikkut ilisimasalinnit sukumiisumik misissorneqarsinnaasanngimmata, nappaatit suussusaasa pilatsinnissamullu periarfissat oqallisiginissaat naliliiviginissaallu ajornakusoornerusarpoq, Uka Wilhjelm Geisler oqaluttuarpoq.

 - Nipi tusarsaanngitsoq atorlugu uummatisiukkatta ilaat pilertortumik akissutisisinnaajumallugit naliliivigitissinnaajumallugillu nakorsaanernik uummatikkut nappaatinik immikkut ilisimasalinnik allanik attaveqateqarsinnaanerup pitsaanerpaanissaa sulinitsinnut nakorsartinnissamullu pingaaruteqarpoq, nakorsaaneq naggasiivoq. 

Dronning Ingridip Napparsimmavissuani ukiut tamaasa uummalluutillit 75-it missaanniittut periarfissaq nutaaq taanna iluaqutigilersussaassagaat, Namminersorlutik Oqartussat oqariartuutigaat.