VIDEO Uumasuusivissuaq MSC-mik allagartalerneqartoq

Sverigemi uumasuusivissuup nukissiuutinik atuinerminik pitsanngorsaanermigut, eqqagassalerinikkut aamma mingutsitsinermut tunngatillugu avatangiisinut naleqqussaanermigut taamatut allagartalerneqarnissani sulissutigisimavaa.

- Taamatut angusaqarnerput nuannaarutigeqaarput. Puisit Østersømi uumasunut pingaarutilerujussuupput, ammassassuarnillu piujuaannartitsinissaq tunngavigalugu pisarineqarsimasunik nerukkaatissaqartinnerat iluarisimaarnaqaaq, Skansenimi avatangiisinut tunngatillugu ataqatigiissaarisoq, Tommy Lambrell msc.org-imut taama oqarpoq.

AAMMA ATUARUK Aalisakkat amerlanerusut MSC-mik nalunaaqutsigaanissaat kalaallit kissaatigaat

Uumasuusivissuaq imaanut sunniuteqarpoq

Marine Stewardship Councilip, MSC-mik allagartalersuisartuusup, Sverigemi uumasuusivissuup piujuaannartitsinissaq tunngavigalugu aalisarnermik taamaatut saqummilaasitsinera assut iluarisimaarpaa.

- Inuit uumasunik nuannarisallit avatangiisinik eriagisaqarnermut tunngatillugu allagartalersuisarnerup imavissuarnut pitsaasumik sunniuteqarnera taamaasillutik paasilertussavaat. Aalisakkanimmi MSC-mik allagartalikkanik pisisartut amerliartortillugit imavissuarni uumasussilinnut tamanna pitsaasumik sunniuteqaleraluttuinnassaaq, Christoph Mathiesen, MSC-p Østersømut tunngatillugu pisortaa taama oqarpoq.

Puisilli kisiisa ammassassuarnik nerisassaqartinneqanngillat, aammattaaq uumasuusivissuup neriniartarfia restaurant Gubbhyllan MSC-mik allagartaqarpoq.

Nunatta imartaani puisit sunik neriniassanerlutik nammineq toqqartarpaat, itinerusumulli neriniassagaluarunik kinguppaat MSC-mik allagartallit nerisinnaakutsoorpaat.

Aamma atuaruk Naalakkersuisoq: Qalerallit MSC-mik siunissami immaqa meqqilersorneqarsinnaassapput