Uumasut orsuat Alsip sineriaanut tipivoq

Orsoq ikaartaammit Lisco Gloriameersuuvoq, ikaartaat taanna sapaatip akunnerani kingullermi Langelandip kujataani ikuallappoq kivillunilu. Sakkutuut imarsiortut qullersaqarfiannit umiarsuaatileqatigiit DFDS isornartorsiorneqarpoq, taakku ullut qulingiluat atorlugit umiarsuaq sunik usinersoq qulaajarmassuk. Sapaatiummat aatsaat tamanna pimmat, sakkutuut imarsiortut paasivaat ikaartaat neqimik orsumillu 1000 tonsimik usisoq. DR Syd taama paasissutissiivoq.

Umiarsuarmilli piginnittut isumaqataanngillat. DFDS-imi attaveqarnermut pisortaq, Gert Jakobsen, oqaluttuarpoq, ikaartaatip kivinerata aqaguani sakkutuut imarsiortut qullersaqarfiata umiarsuup usigisimasaasa ulorianartut allattorsimaffiat piumasimagaat, taannalu ingerlaannaq tunniunneqartoq. Kisiannili:

- Puulukit neqaat 1000 tonsit avatangiisinut akornutaasinnaanersut kialuunniit takorloorsinnaanngilaa, Gert Jakobsen oqarpoq.

- Jyllandip kujataani sinerissami mingutsitsineq uagut ikaartaatitsinneersuuppat, tamanna umiarsuuaatileqatigiinnit ajuusaarutigineqarnera qularineqassanngilaq. Immaqa tulliani neqi usinut ulorianartunut ilanngullugu allassavarput, Gert Jakobsen DR-imut oqarpoq.

Alsip sissaanut suli orsumik tipisoqartarpoq, piffissarlu sivisooq atorlugu inuppassuit saliisoqareerput.