Uumasut nakorsaat: Qimmiutillit kommunellu inatsit unioqqutippaat
Qimmiutillit qimmimik akiuussutissanik kapitinnissaannut isumaginnissimanngitsut kommunemiit peqquneqarsinnaapput qimmitik kapiteqqullugit. Tamannalu qimmiutillit kommunellu malissallugu pisussaaffigaat uumasut nakorsaat Elisabeth Mærsk Møller oqarpoq.
Savissivimmi piniartup Qaerngaaq Nielsenip oqaatigaa qimmit toqorarnerannut pissutaasoq akiuussutissanik kapuuisimannginneq, tassungalu ilanngullugu Qaerngaaq Nielsenip oqaatigaa piniartut piniutiminnik annaasaqartillugit, atortuutit allarpassuit assigalugit qimmit qimuttut sillimmasiinermi ilaatinneqanneq ajortut. Tamannalu misissuisimaneri aallaavigalugit KNAPK-p iliuuseqarfigilersaanngikkaa siulittaasup Peter Olsenip oqaatigaa.