Uumasut nakorsaat: Inuit timmissat nualluutaannik tunillatsittarnerat qaqutigoorluinnarpoq
Timmissat nualluutaannik tunillatsinnissat annilaangassutigissanngilat.
Uumasut nakorsaat Anna Jespersen appat timmissat nualluutaannik nassaarfigineqarnerisa kingorna oqarpoq.
Nuup avataanit Fyllas Bankemit appat marluk Qeqertarsuarmiillu mitit tallimat katersorneqarput. Taakku Københavns Universitetimi misissorneqarput appallu timmissat nualluutaannik nassaarfigineqarlutik.
Timmissat nualluutaat
Fyllas Bankemit appat marluk Qeqertarsuarmiillu mitit tallimat timmissat nualluutaannik napparsimanersut paasiniarlugit Københavns Universitetimi Statens Seruminstitut sinnerlugu misissorneqareerput.
Appat marluk timmissat nualluutaannik H5N1-imik napparsimasut misissuinermi paasineqarpoq. Timmissat nualluutaat taanna timmissat akornanni toqqutaakkajuttarpoq.
Nunatsinni aatsaat siullermeertumik timmissat nualluutaannik paasisaqartoqarpoq.
Uumasulli nakorsaat, Anna Jespersen eqqissisaavoq. Inuimmi timmissat nualluutaannik tunillatsittarnerat qaqutigoorluinnarpoq.
-Kalaallit Nunaanni timmissat virusimik nassaarfigineqarnerat annilaangassutigerujussuartariaqanngilaq, virusimi taanna qaqutigorujussuakkut aatsaat inunnut tuniluussinnaasarmat, taanna oqarpoq.
Ikittunnguit kukkukuuteqartut
Taassuma nunatsinni timmissat nualluutaannik nassaartoqarnera tupaallaatiginngilaa. Timmissammi tunillatsissimallutik isorartuumut timmisinnaasarput. Nunatsinnilu timmissat akornanni tuniluuttoqalernissaa aamma ernumassutiginngilaa.
Nunatta kujataani kukkukuujuteqartoqalaarpoq, kisianni ikingaarmata nunatsinni timmissat nualluuteqarnerat annilaangananngilaq.
AAMMA ATUARUK Aatsaat siullerpaamik: Nunatsinni timmissat nualluutaannik nassaartoqartoq
Timmiamik toquinnarsimasumik nassaaraanni taanna attorneqassanngilaq. Taamaaliornikkut taamaallaat tunillaasoqarsinnaavoq, Anna Jensenillu timmiamik toquinnarnikumik naammattuuisoqassappat Namminersorlutik Oqartussat Pinngortitaleriffillunniit attavigineqarnissaat kaammattuutigaa.
- Timmissamik toqungasumik uumasunilluunniit allanik pinngortitami toquinnarsimasunik naammattuuigaanni tiguneqartariaqanngilaq. Oqarasuaatikkut uagutsinnut Aalisarnermut Piniarnermullu Naalakkersuisoqarfimmut imaluunniit Pinngortitaleriffimmut sianertoqarsinnaavoq. Uagut aasinnaavarput, taamaaliornikkullu tunillatsittoqarnissaa aarlerinannginnerussalluni.
- Qaqorsaaserlutit errortorit, pingaartumik erlaveersereerninni.
- Timmissat erisarnagit amiikkit (pujoralatserinnginneruvoq).
