Uumasut nakorsaanerat qimmit qimuttut DNA-vinik misissuisarneq pillugu: Inatsiseqanngilaq
Qeqertarsuarmi qimminik akusanik eqqussisoqarsimasinnaaneranik pasilliutinik politiinut nutaamik suliassanngortitsisoqarsimanngippat mattussisoqartariaqanngitsoq Qimusseq 82-imiit isumaqarput.
SULIAP INGERLANIKUUNERA:
Januar 2018:
- Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.
Oktober 2018:
- KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.
November 2018:
- Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.
Marts 2019:
- Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.
Maj 2019:
- DNA-mik misissuineq piareerpoq - inernerali isertuunneqarpoq.
Juni 2019:
- Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.
Juli 2019:
- Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.
Oktober 2019
- Suliaq eqqartuussivimmut anngunneqassangaluaruni pisoqalereersimassammat politiit suliamik misissuinerminnik unitsitsipput
Decembar 2019:
- Qimmit qimuttut marluk DNA-visa misissorneqarnerisa allanertanik akusaasut takutippaat.
Aasaq 2020:
- KNQK-p qimussersat ukiuni tallimani mattunneqarnissaat aalajangerpaa.
Qeqertarsuarmi Kangerlummilu qimmit qimuttut tamarmik DNA-vi misissorneqartinnagit KNQK-ip mattusimatitsinini aalajangiusimavaa.
Qimmit tamarmik misissorneqarsinnaagaluarput. Oqartussalli inatsimmik tunngavissaqannginnamik pinngitsaaliillutik misissuisinnaanngitsut, uumasut nakorsaanerat nassuiaavoq.
- DNA-nik misissuinissaq ajornaquteqanngilaq, nunatsinni uumasut nakorsaanerat Sanne Wennerberg oqarpoq.
Qimmit qimuttunut DNA-vinik misissuinissaq periarfissaagaluarpoq, oqartussalli misissuiartorsinnaanngillat, misissuisinnaanermut inatsiseqanngimmat.
- Inatsisinik tunngavissaqannginnatta misissuisinnaanngilagut. Oqartussatut tunngavissaqanngikkaanni qanoq iliuuseqarnissaq erloqinartorujussuuvoq. Qimminut qimuttunut inatsisissap naammassineqarnissaa utaqqivarput, Sanne Wennerberg oqarpoq.
Uumasut nakorsaanerata KNQK timersoqatigiiffittut nammineq maleruagassaqarluni kattuffiummat oqartussat akuleruffigisinnaanngikkaat erseqqissarpaa.
- Oqartussatut KNQK-p aalajangigaa qanoq iliuuseqarfigisinnaanngilagut, taakkuppummi sukkaniutsitsisartut, Sanne Wennerberg oqarpoq.
Qimmilinnut innersuutaasoq
Qimmeq isikkuatigut ilumut allanertaanersoq kalaallilluunniit qimmerineraat takuneqarsinnaanngilaq. Taamaammat DNA atorlugu aatsaat paasineqartarpoq. Uumasulli nakorsaanerat qimmilinnut innersuussuteqarpoq.
- Qimmit akusaassangatikkaanni, taava qimmeqartup nammineerluni iliuuseqarnissaa sukannersumik innersuussutigaara. Qimminik misissuisarnisatsinnut inatsisitigut tunngavissaqanngilagut - suliassanillu ingerlatitseqqiisinnaanngilagut.
Qimmit qimuttunut DNA-vinik misissuineq aalajangersimasumik akeqanngilaq. Misissuisoqanialeraagalli DNA-ni misissuineq, misissugassaq apeqqutaalluni qanoq akeqassarnersoq naatsorsorneqartapoq.
Qimmit qimuttut Qeqertarsuarmiittut 2017-ip kingorna piaqqiaasut tamarmik DNA-kkut misissortinnissaannik Naalakkersuisut peqquneqarnissaannik Inatsisartuni aalajangiiffigisassatut siunnersuut, Inatsisartut ukiaanerani ataatsimiinerani eqqartorneqassaaq.
