Uumasut arlaqartut nungutaanissaminnut navianartorsiorput

Nunani issittuni uumasut 17-init nungutaanissaminnut navianartorsiortinneqartut, uumasut assigiinngitsut suunerinik nalunaarsuisarfiup, Center for Biological Diversityp nalunaarusiaani allaaserineqarpoq.

Nungutaasinnaasut ilaattut eqqaaneqarput terianniat aamma arferit, Sikunews.com taama allappoq.

- Nunani issittuni sikup aakkiartupiloornerata kinguneranik nungutaasinnaasuni nanoq ilisimaneqarnersaavoq. Nunarsuattali kissakkiartornera qanoq iliuuseqarfiginngikkutsigu uumasorpassuit allat aamma nungutaariaannaapput, Shaye Wolf oqarpoq.

Issittuni uumasut nungutaanissaminnut navianartorsiortinneqartut amerliartorput misissuinermi oqaatigineqarpoq.

Nerisaasa aamma uumaffinnaavisa allanngoriartorneri pissutaallutik navianartorsiortinneqartut. Tamakkulu pissutaallutik uumasut maanna ikilisorujussuusut, Shaye Wolf oqarpoq.

Uumasut nungutaannginnissaat anguniarlugu qanoq iliuuseqartoqartariaqartoq nalunaarusiami allaaserineqarpoq. Qanoq iliuutsillu pitsaanersaraat CO2-mik aniatitsinerup annikillineqarnera, taamaaliortoqarpallu ukiut 25-t matuma siornatigutut sikusaleqqissinnaasoq allaaserineqarluni.