Uumasunik illersuisut arferit annaakkumallerpaat
Amerikamiut uumasut illersorneqarnissaat pillugu kattuffiata naalisarlugu WSPA-mik taaneqartartup kiisalu uumasut ikinngutaasa nittartagaq arferit annaanneqarnissaannik oqariartuuteqartoq ullumi atuutilersippaat.
Nittartakkami uunga iserfigineqarsinnaasumi www.redhvaler.nu tassani arfernut annaasseqataajumasunut atsiortoqarsinnaavoq.
Taakku taama iliornerminnut siunertaraat, IWC-p tassa arfanniarneq pillugu ataatsimiititaliarsuup ilaasortaatitaa Ole Samsing maajimi ukiumoortumik nunat tamalaat ataatsimeersualerpata peqataassammat taamalu arferit tunisassiassatut pisarineqartalernissaat oqallisigineqalerpat tamatumunnga naaggaarnissaanut kajumissaarniaramikku.
Arferit niiverutissatut pisarineqartalernissaat akerlerigaanni maanna nittartakkami atsiortoqarsinnaalereerpoq
Atsiornerillu naammaseriarpata inunnut oqartussaasunut sisamanut nassiunneqartussaapput tassalu: Danskit Nunanut allanut ministeriannut Per Stig Møllerimut, avatangiisinut ministerimut Connie Hedegaardimut, nunatsinni naalakkersuisut siulittaasuannut Hans Enoksenimut minnerunngitsumillu ataatsimeersuarnermi Danmarki sinnerlugu peqataasussamut Ole Samsingimut.
