Uuliasiorsinnaanissamut neqerooruteqartoqarpoq
Qeqertarsuup tunuani uuliasiorsinnaanissamut neqerooruteqarneq Ilulissani aallarteqqammerpoq. Kisiannili aningaasaatilissuartut pissusilersornissamut piffissaq suli siusippallaarpoq. Ukiut qulit qaangiuppata uulia Qeqertarsuup Tunuanit qaqissorneqarumaartussaq, aningaasarsiutaangaatsiarsinnaavoq. Massakkulli uuliamik aningaasarsiorneq nunatsinni qanoq ippa?
Nunarsuarmi tamani uuliasiorneq aningaasarsiornikkut unammillernermik sakkortuumik ingerlanneqarpoq. Taamaammat Kalaallit Nunaat uuliasiornermik aallarterlaajunera immikkut eqqarsaatigineqartariaqarpoq.
- Suli uuliamik nunatsinni nassaartoqarnikuunngilaq, taamaammallu uuliasiortunut pilerinarsaaraluta neqerooruteqartariaqarsimavugut, nunanit uuliasiorfioreertunik pilerinarnerusumik, Jørgen Wæver Johansen oqarpoq.
Avatangiisinik misissuinerit tunngavigalugit uuliamik mingutsitsisoqannginnissaa pinngitsoortinniarlugu, taamaalillunilu aalisakkat immallu ajoqusinnginnissaa qulakkeerlugu, Kalaallit nunaat neqeroorummi sakkortuumik piumasaqaateqarpoq.
Kalaallit Nunaata uuliamit aningaasarsiornissaat suliffeqarfiit akileraarutaannik taamaallaat tunngaveqarpoq, uuliasiortussalli sinneqartoorutaasa 55 procentiata missaaniittoq Kalaallit Nunaannut tuttassasoq, Aatsitassanut Ikummatissanullu Pisortaqarfiup pisortaa Jørn Skov Nielsen-ip naatsorsuutigaa.
Nuna Oil-illu uuliasiornerit tamaasa, aningaasartuuteqanngikkaluarluni, 12,5 procentii pigaat.
Qanoq Kalaallit Nunaat aningaasarsiortigissanersoq suli oqaatigineqarsinnaanngilaq. Nalunngiinnarparput ukiut kingulliit ingerlaneranni uuliap akitsoraluttuinnarnera, isertitaqarluarsinaanissamut periarfissiisoq. Kalaallit Nunaata pinngortitaa uuliasiorffigiuminaatsuuvoq taamaalillunilu uuliasiornissaq akisussalluni, tamannali nunat uuliasiorfissuaqarfiit soqutiginagu Ilulissani uuliasiornissamut neqerooruteqarnermut peqataapput. Uuliasioqatigiiffiit nunatsinni uuliamik ujarlernerni aningaasarpassuarnik atuinikut aamma peqataapput.
- Asuliinnarmi maaniinngillat, takusinnaagamikkuli aningaasarsiorfiulluarsinaasoq, tamannalu peqataaffigerusuppaat, Aatsitassarsiornermik naalakkersuisoq jørgen Wæver Johansen oqarpoq.
