Uuliasiornissarsuarmut Aasianni piareersakannilereerput
Aasianni malunniutilereerpoq. Umiasualiviup pisortaa Hans Rafaelsen oqarpoq umiarsualivimmi ulappunnerulersussaallutik.
- Umiarsuit arlariit Aasiannut tikerartalernissaat malunnagaatsiartussaassaaq, taamaattoqarneralu ulapputigingaatsiartussaassavarput, Hans Rafaelsen oqarpoq.
Nunat allamiut Aasiannut tikittalereerput ilaatigut Skotlandimiit Danmarkimiillu.
Aasianni umiarsualivimmi sulisussanik atorfissaqartitsineq aamma malunniutereerpoq.
- Umiarsuit naammaginartumik sullinneqassappata pingasuniit arfineq pingasut tikillugit sulisussanik ilaqqittussaassapput, Aasianni umiarsualiviup pisortaa Hans Rafaelsen oqarpoq.
Uuliasiortunut kiffartuussisussanik sungiusaaneq Qaasuitsup Kommuneata ingerlatereersimalerpaa. Nuna Oil suleqatigalugu sulisussat 24-t sullissinissamut sungiusartinneqareerput ilaatigut tuluit oqaasiinik ilinniartinneqarlutik, KNR-imut kommunimiit oqaatigineqarpoq sungiusarnissamut peqataarusuttunik soqutigineqarluarsimasoq.
Aasianni Sulisitsisut Peqatigiiffiata ilaasortai pisussanut peqataanissaminnut ilimasunnginnerarput.
- Aasianni suliffeqarfiit suliassaat annertugisassaanngitsutut isikkoqarput. Aasianni Sulisitsisut Peqatigiiffiata siulittaasua Peter Lynge oqarpoq.
Nangilluni oqarpoq Cairn sulisussanik noqqaasimanngitsoq.
- Aasianni innuttanut tusarniaasitsinermi Cairn oqarpoq illoqarfimmi pissutsinut akulerunnaveersaarniarlutik, Peter Lynge oqarpoq.
Taamaakkaluartoq sulisitsisut nikalloratik neqerooruteqarsimapput.
- Arlaannik atorfissaqartitsisoqarpat piareersimalluta oqaatigaarput, Peter Lynge naggasiivoq.
Aasianni Umiartortut angerlarsiamaffiata pisortaata oqaatigaa namminneq ulapinnerulersimallutik. Aamma inissaminnik inniminniisut amerlisimanerarpaat.