Uuliasiornissanut piareersaleruttorput

Uuliamik ujaasilluni qillerinissanut Qaasuitsup Kommunia maanna piukkunnarsaleruttorpoq. Kalaallit qallunaallu suliffeqarfiinit pingasunit sukumiisumik siunnersorneqareerluni, kommunip suliffeqarfiup siunnersuisoqatigiiffiup Cowi Greenlandip isumaqatigiinniarneqalernissaa aalajangiuppaa.

Avataani qillerinerit nunami suliassanut ataqatigiissarneqarnissaat, kommunip pilersaarusiornerani suleqatigiissutigineqassaaq.

Cowip Norgemi Ruslandillu avannaani imaani qillerinermik ineriartortitsinerit suleqataaffigisimavai. Tamatumunnga peqatigitillugu Cowip Qatarimi uuliasiornernit gassimillu qalluinernit misilittakkani maani atorsinnaallugit neqeroorutigai.

Qaasuitsup Kommuniani borgmesterip Jess Svanep suleqatigiinnissaq qilanaaraa, tamannami kommunimut aningaasaliisarnissanut aqqutissiuussisussaammat.

- Tamatumunnga tunngatillugu siuttutut inissisimarusuppugut, neriuppungalu suleqatigiinnissami matumani, tamanna qanilliallanneqassasoq, Jess Svane oqarpoq.