Uuliasiornissamut qinnuteqartut ilimagisamit amerlanerupput
-Isumaqarpunga uuliarsiortitsinissaq iluatsitsiffiulluartumik ingerlasoq.
Ilimagisimanngikkaluarparput akuersissutinik arfinilinnilluunniit tunisaqarnissarput. Pingasunimmi sisamanilluunniit tunisaqarnissarput assorsuaq naammagisimaarsimassagaluaratsigu. Nuannarutigeqaarput uuliasiortitsinissamik akuersissutinik tunisaqarnerput maanna qaffasinnerpaaffissaminiimmat, 1970-kkunnili tamarsuaq soqutiginnittoqarmat aatsaat taama soqutiginnittoqaqqitsigaaq.
Suliffeqarfiillu taakku ukiuni tulliuttuni uuliasiornerminni aningaasarpassuarnik atuisussaapput.
Suliffeqarfik Husky Oil, Canadameersoq, uuliasiorfissanik marlunnik maannakkuugallartoq akuerineqarsimavoq, aallartereerlunilumi.
Tamatuma saniatigut uuliasiorfissanut marlunnut akuerineqarnissaat atortussiassat aatsitassanit pisut pillugit Siunnersuisooqatigiit suliaralugit naammassingajalerpaat. Nunatsinni naalakkersuisut Danmarkimilu naalakkersuisut isumaqatigiissut akuereqqaartussaavaat, ilimagineqarporlu septemberip naalernerani oktobarilluunniit aallartilaarneranni isumaqatigiissut illua´tungeriinnit atsiorneqassasoq.
Qanorluunniit uuliasiornermi angusaqartoqaraluarpat ukiorpassuarni uuliassiornissamik akuersissut nutaamik sananeqartuaannarsinnaavoq.
- Uuliasiorniartut akuersissummik pigaangamik ukiuni qulini uuliasiorsinnaanerat akuerineqartarpoq.
Ukiunilu qulini suliffeqarfissuit tamakkua ataannartumik uuliasiorniartillugit taakkua akiliutaat milliardtit affaanik amerlassuseqalersinnaapput.
Ukiullu taakkua ingerlaneranni uuliamik nassaartoqarpat, uuliasiorfiusumi pineqartumi ukiuni 30-ni ujaaseqqissinnaaneq ingerlanneqarsinnaavoq, uuliamik tunisassiornerup saniatigut.
