Uuliasiornermik isertitat isumaqatigiinngissutaapput
Nunatta Danmarkillu akornanni uuliasiornermit isertitanik aningaasaateqarfiliornissaq pillugu assortuunneq aallartippoq. Isumaqatigiinngissutaasoq tassaavoq aningaasaateqarfimmut kikkut piginnittuussanersut aamma aningaasat qanoq agguataarneqassanersut. Uuliasiornermit isertitat siunissami qanoq agguataarneqarnissaat nunatsinnit Danmarkimillu ullumi isumaqatigiissutigineqanngitsoorpoq.
Ataatsimiinneq pakatsinartuuvoq. Pisinnaasarput naapertorlugu naapiffissarsioraluarpugut, taama oqarput konservativineersoq Per Ørum Jørgensen aamma Søren Espersen Dansk Folkepartimeersoq. Politikerit taakkua marluk talerperliuniartuneersut suleqatigiissitat siulittaasuata Frank Jensenip naaperiarfissatut siunnersuutaanut kalaallit akuersaarnerunissaat neriuutigisimagaluarpaat.
Siunnersuut tassaavoq siunissami ataatsimoortumik tapiissutit qanoq aaqqinneqarnissaannik – minnerunngitsumillu – aatsitassarsiornermit isertitat qanoq agguataarneqarnissaannik periaasissamik siunnersuutaagaluarpoq. Siunnersuut kalaallit suleqatigiissitami ilaasortaasut akueriuminaatsippaat, tassami siunnersuutaammat isertitat nunatta Danmarkillu akornanni aveqqissaarneqassasut. Tamanna kalaallinit isigalugu maannamut isumaqatigiissutaasumut ajorseriaataassaaq, maannami isertitat 500 millionit koruunit tikillugit amerlassuseqarpata nunatta Danmarkillu avittussaavaat isertitallu taakkunannga amerlaneruppata isumaqatigiinniutigineqartussaallutik.
Frank Jensenip naaperiarfissatut siunnersuutaanut taarsiullugu Inatsisartut 2005-imi aalajangigaat kalaallit ullumi saqqummiuppaat. Tassani Inatsisartut aatsitassarsiornermi pisortaqarfik uuliasiornermit isertitanik aningaasaateqarfiliornissamut siunnersuusioqqullugu qinnuigaat. Siunnersuut maanna Namminersornerullutik Oqartussat iluanni tusarniaassutigineqarpoq Norgemiullu uuliasiornerminni aningaasaateqarfiliorsimanerat tunngavigineqarluni. Kisianni aningaasat agguataarnissaat uuliasiornermillu isertitat agguataarnissaat danskit ilaasortaatitaasa isumaqatiginngilaat.
Suleqatigiissitap siulittaasua Frank Jensen Radioaviisimut oqarpoq, kalaallit isumaannut naapertuuttumik naaperiarfissamik nutaamik nassaarniarniarluni. Frank Jensenip siunertaraa ilaasortat isumaqatigiillutik periaasissamik Namminersorneq pillugu Ataatsimiititaliarsuarmut innersuussuteqarsinnaanissaat. Peqatigitilluguli nassuerutigaa, isummat soqutigisallu taama assigiinngitsigitillugit naapisitsiniarnissap ajornakusoorsinnaanera.
Suleqatigiissitamut kalaallit ilaasortaatitaat, Kuupik Kleist IA-meersoq ullumikkut ataatsimiinneq pillugu oqaaseqarusunngilaq. Uppernarsarluguli Namminersorneq pillugu Ataatsimiititaliarsuarmut innersuussutissamik isumaqatigiissuteqarnissaq suli anguniarneqartoq. Suleqatigiissitamut Demokraatit ilaasortaatitaata Per Berthelsenip Kuupik Kleistip oqaasii innersuussutigai, oqaatigaluguli danskit ilaasortaatitaat ullumikkut ataatsimiinnissamut isumalluarpallaarsimasut.
- Frank Jensenip naaperiarfissatut siunnersuutaanut assigiinngitsunik paasinnillutalu isumaqarpugut, Per Berthelsen oqarpoq. Taassumali neriuutigaa suleqatigiissitaq isumaqatigiilluni Ataatsimiititaliarsuarmut innersuussuteqarumaartoq.
Suleqatigiissitap ataatsimiinnissaa tulleq Namminersorneq pillugu Ataatsimiititaliarsuup januaarip naalernerani ataatsimiinneranut atillugu ingerlanneqassaaq.
