Uuliasiorfiup kivisup mingutsitsinissaa ernummatigineqarpoq

Uuliasiorluni qilleriviup, Deepwater Horizonip, uuliaqarfik nunap iluani kilometerinik tallimanik ititigisumiittoq qilleriffigileruttoraluarpaa. Tassungalu atatillugu nunap iluani uuliaqarfik gasseqarfilluunniit qillerutaata eqqorsimannguatsiarpaa, taamaalimmallu uulia gassilu naqitsinermit sakkortuumit suppunneqarsimapput. Tamannalu uuliasiorluni qillerivimmi ikuallannermut aallaaviusimagunarpoq.

Ikuallattoq akunnerni 36-ni ikumavoq, qatserneqaraluaramilu qaminngitsoorneqarpoq, naggataatigullu Deepwater Horizon kivivoq. Maannalu immap iluani susoqassanersoq apeqqutaalerpoq.

Jørgen Madsen, Mærsk Drillingimeersoq ima nassuiaavoq:

- Takorloorneqarsinnaavoq immap naqqani ammartartumik taaneqartartoq angisooq, suppussinissamik pinngitsoortitsisussaq, suli inissisimaffimminiittoq. Taamatullu takorloorneqarsinnaavoq sullullit tassunga atasut ilaat immap naqqaniit qatsinnerusumiittut ammartartup matuniarnissaanut atorneqarsinnaasut.

Ilisimatuut isumaqarput Mexicop kangerliumanersuani ukiuni kingullerni 30-ni suppussineq annerpaaq peratarsinnaasoq. Uulialu immap naqqanit aniasoq pinasuartumik unitsinneqarsinnaanngippat imaluunniit immap qaaniit katersorneqarsinnaanngippat, Louisiannap imartaani sineriaanilu pinngortitamik mingutsitsineq angisooq periaannaavoq.

Taamali pisoqarnissaa pinngitsoortinneqarsinnaasoq Jørgen Madsen oqarpoq.

Ammartoq immap naqqaniittoq suli atorsinnaassappat, aqqartartoq inuttaqanngitsoq atorlugu ammartartoq matuniarneqarsinnaavoq. Ammartartup ajoqusersimannginissaa soorunami tamatumani apeqqutaassaaq.