Uuliasiorfissuit Ilulissaniileruttorput
Nuussuaq avannamut killigalugu, kujammut Attup nalaa tikillugu, imartat 92.000 kvadrat-kilometerit nunatsiini uualiasiorfigineqarsinnaasutut neqeroorutigineqarput. Europamiut USA-meersullu uuliasiornissamik soqutiginnittut katillugit 13-it maannakkorpiaq Ilulissaniileruttorput. Aatsitassaqarnermut Naalakkersuisoq Jørgen Wæver Johansen ima oqarpoq.
- Immikkoortunut arfineq pingasunut immikkoortillugit maannakut uuliasioqatigiiffinnut neqeroorutigineqarnerat ullumikkut ammarparput. Maannakkut maaniipput nunarsuarmi uuliasioqatigiiffiit annerpaat 13-it, taakkualu maaniinnerminni paasisat kingullerpaat pissarsiarissavaat. Uuliasioqatigiiffiit periarfissaqarput decembarip 15-ata tungaanut misissuissallutik neqerooruteqassallutillu. Immikkoortut taakkua arfineq pingasut arlaat tamaasaluunniit neqerooruteqarfigisinnaavaat. Uuliasioqatigiiffinnut piumasaqaatit assigiinngitsorpassuupput, ilaatigut avatangiisit pillugit piumasaqaatit pingaartinneqarlutik ilaatinneqarput. Aammali sulisoqarnermut tunngatillugu aammalu aningaasaqarnermut tunngassuteqartunik piumasaqaatinik peqarluni, Jørgen Wæver Johansen oqarpoq nangillunilu: Pingaarnerpaanut ilaavoq, nunatta piginneqataaffigisaa Nuna Oil-ip minnerpaamik 12,5 procentimik aningaasartuuteqarfiunngitsumik piginneqataanissaa pingaartinneqarmat.
Jørgen Wæver Johansen aamma oqarpoq, ullumikkut pisoq, decembarip 15-iani kinguneqarpat, nunatta oqaluttuarisaaneranut pingaaruteqartoq, decembarillu qaammataani neqeroortoqassappat, nunatta aningaasarsiorneranut pingaaruteqarsinnaasoq naalakkersuisoq oqarpoq. Uuliamik nassaartoqassagaluarpat, nunatta aningaasatigut isertitassai immikkut aamma piumasaqaatitaqarput. Uuliamik qalluisoqalissappat, siusinnerpaamik ukiut qulit aatsaat qaangiuppata pisinnaassasoq, Naalakkersuisoq Jørgen Wæver Johansen oqarpoq.
