Uuliaqassappat iluanaarutissartai naatsorsorneqareerput
Nunatsinni uuliaqarneranik misissuiumallutik qinnuteqaatit arfinillit Namminersornerullutik Oqartussanit unnuaq unnuaqeqqanut tiguneqarput, aningaasarpassuarnillu isertitsissutaasinnaanerat
Aatsitassanut Naalakkersuisup Jørgen Wæver Johansenip ilimagaa.
- Ukiuni tulliuttuni qulini milliardit koruunit arlallit atorlugit piareersartoqassaaq, tamannalu nunatta iluaqutissaraa. Jørgen Wæver Johansen nassuiaavoq.
Uuliasiorfiutileqatigiiffissuit Exxon, Chevron, Husky aamma Dong nunatsinni imartanut immikkoortunut arfinilinnut Qeqertarsuup Nuussuullu avataani uuliaqarsinnaaneranik misissuiumallutik uuliasiulerumallutillu qinnuteqarput. Uuliassaqassappallu isertitsissutitaasinnaasut naatsorsorneqamisaareertut Aatsitassanut Ikummatissanullu Pisortaqarfimmi pisortaq Jørn Skov Nielsen oqarpoq.
- Assersuutigalugu Nuup kitaata imartaani Canadap killeqarfianut qanittumi uuliaqassappat uuliap ullumikkut akia naapertorlugu ukiunut 30-nit 50-inut missingersuukkaanni pisortat 200 milliard koruuninik iluanaaruteqarsinnaassapput. Jørn Skov Nielsen oqarpoq.
Aatsitassanut Ikummatissanullu Pisortaqarfik uuliasiorfiutileqatigiiffinnik isumaqatigiinniarnernik ingerlatsisussanngorput. Isumaqatigiinniarnerit inerneri qinikkanut qaammatit tulliuttut ingerlanerini saqqummiunneqassapput, akuersissuteqarnerit aappaagu marsimi piniassammata.
