Uuliaqarnersiortut qilalukkanik qimaatitsinngillat
-Uuliaqarneranik misissuisut nipiliornerannit qilalukkat qimaatinneqarsimanissaat ilimaginngilluinnarpara, Jørn Skov Nielsen Aatsitassanut Pisortaqarfimmi pisortaq oqarpoq.
Tunup avataani uuliaqarneranik misissuisoqarnera ilumoortuusoq taamaattorli misissuineq avasissorujussuarmi avannarpasissumilu ingerlanneqartoq Jørn Skov Nielsen erseqqissaavoq.
- Misissuiffigineqartoq avasingaatsiartorsuarmi avannarpasissutsip 75 gradip nalaaniippoq, taassumalu saniatigut Jameson Landip avatingaatsiaani avannarpasissutsip 70 gradip nalaani aamma annikitsumik aggustip 18-ianut killilikkamik misisuisoqarnikuuvoq.
Oqarportaaq immap naqqanik sajuppillatsitsisarlutik uuliaqarneranik misissuisut qaartitsisarsimanngitsut nipilli maligaasai atorlugit sajuppillatsitsisartut.
- Immap naqqanik sajuppillatsisarlutik misissuisussatut akuerineqartut aallaqqaammulli pinngortitamik innarlitsaaliinissamut peqqussutinik maleruagassaqartarput, innarliinnginnissarlu pillugu uppernarsaammik piumaffigineqartarlutik. Nipi atorlugu sajuppillatsitsisarnerup imaani uumasunut sunniutai pillugit arlaleriarluni misisuisarnerit aamma uppernarsarpaat taama sajuppillatsisarnerit uumasunik nujutsitsineq ajortut. Misissuisarnerni uppernarsineqarnikuuvoq aalisakkat arferit allallu sajuppillatsisiviup nalaanit ungasinngitsumut nuuttartut sajuppillatsinerilli unikkaangata uteqqittarlutik.
Nipi atorlugu sajuppillatsitsisarnerit nipikitsumik aallartillugit nipittoriartorneqartarput uumasunik tupatsitsinngissaq pillugu sajuppillatsitsiffiullu nalaani arfeqaraangat sajuppillatsitsiarnerit unitsinneqarallartarput.
Geologit umiarsuaanni ekkolodit pissutigalugit qilalukkat nuussimanissaat piniartut aamma ernummatigaat, sineriammili tamarmi angallatit ekkolodillit angalaartuarmata tamaattoqarsimanissaa pasinarpallaanngitsoq Jørn Skov Nielsen oqarpoq.
