Uuliap maqisup mileriarneqarnera iluatsinnersoq aqagu paasinarsissaaq
Uuliasiortitseqatigiiffiup BP-p qillerivik uuliap maqiffia marullummik immerlugu unitsinniarsaraat.
Uuliamik maqisumik unitsitsiniarsarineq maannamut pissusissamisut ingerlasoq, BP-mit oqaatigineqarpoq, taamaattorli marullummik immiineq arlaleriarluni unitsinneqartarsimavoq. Tassa qillerivimmut marullummik immiinerup qanoq sunniuteqarnera takuniarlugu unitsikkallarneqartarmat.
Uuliap maqisup unitseriarneqarnera iluatsinnersoq uuliasiortitseqatigiiffiup aatsaat aqagu ullukkut oqaaseqarfigisinnaavaa.
Ilisimatuut Mexicop Kangerliumanersuani umiarsuarni ilisimatusarfinniittut maanna oqaatigisalerpaat, uulia maqisoq tamakkerluni immap qaavanut qaffakaaginnanngitsoq.
Simernerujussuarnilli uuliamik gassimillu akulinnik, immami itisuumi sarfaatitittunik naammattoorsisimallutik, taakkulu isumaqarput tamakkua immami uumasunut kingunerlorujussuarsinnaasut.
