Uuliap aqqutissaa indianerit reservatigoortussaq itigartitsissutigineqartoq
![](/sites/default/files/styles/image_934x467/public/article_images/sioux_indianere_joe_brusky_flickr.png?itok=tE3p3Bep)
Uuliasioqatigiiffik Energy Transfer Partners taamaalilluni uuliap aqqutissaa indianerit nunaat illernartoq USA-mi North Dakotamiittoq aqqutiginagu allami sanaartortariaqalerpaa.
Amerikamiut sakkutuuisa ingeniørit (U.S. Army Corps of Engineers) ippassaq tamanna nalunaarutigaat.
Uuliasioqatigiiffiup uuliap aqqutissaata Dakota Access Pipelinep kilometerinik 2.000-inik isorartutigisup Lake Oahep eqqaani kuussuaq Missouri ikaarlugu sanaartornissaanut akuersissut pisariaqartinneqartoq tunniunneqassanngitsoq aalajangiunneqarpoq.
Indianerit avatangiisinillu illersuiniat tuusintillit uuliap aqqutissaanut akerliussutsimik takutitsisaqattaarput, isumaqaramik sanaartugassaq milliarderpassuarnik naleqartoq indianerit North Dakotami nunaannut illernartunut avatangiisinullu ulorianartorsiortitsissasoq.
Suliniutigineqartorli ilumut unitsivissorneqassanersoq maanna apeqqutaaginnalerpoq.
Amerikamimi naliliisartut arlallit oqaatigaat Donald Trump præsidentitut ivertinneqariarpat uuliasioqatigiiffik suliniutimi naammassinissaanut akuersissummik tunineqarumaartoq.