Uuliap aqqutaa apummit naqinneqarnerminik putuvoq
Kulusummi ippassaq Nukissiorfiit tankeqarfiata aqqutaani uuliakoornermut peqqutaasoq paasineqarpoq.
Allattoq Oline I. Olsen
Uuliap aqqutaata apummit naqisimaneqarnerminik putusimassasoq, Nukissiorfimmit ilimagineqarpoq.
Uuliakoornermi solari 4.500-t 5.000 literillu akornanni annertutigisoq eqqoriarneqarpoq.
Uuliakoornermi saliineq nunaqarfimmi qatserisartunit kommunemilu sulisuinit ingerlanneqarpoq. Qatserisartullu pisortaata Hendrik Andreassenip 1.000 literit missaaniittoq qaloorneqareersorivaa.
Solari aput 4-5 meterisut issutigisup ataaniittoq imaanut kuunniissaa ilimagineqanngilaq.
Kulusummi uuliakoorneq nunaqarfiup innaallagiaqarneranut imeqarneranullu ajoqutaassanngitsoq, Nukissiorfimmit nalunaarutigineqarpoq.