Uuliap akitsoriartornera savaatilinnut nalorninartorsiortitsivoq
Savaatillit suli savaaqqat savallu neqaaniit aningaasat isertittagaat amerlanerupput, 81 – 82 procentii taakkunannga isertinneqartarmata procentillu sinneri sulianit allanit isertinneqartarput.
- Kisianni aamma illuatungaatigut takuneqarsinnaavoq savamut ataatsimut aningaasartuutit ukiuni kingullerni qaffariarsimasut.
-Ikummatissamut aningaasartuutit qaffariarujussuarnikuunerat tamatumunnga pissutaavoq. Eqqaamasakka malillugit solarimut literimut 2002 –mi 1kr 65 øre-miikkaluarpoq. Taava maannakkut 4 kr sinnereerpoq. Sakkortoqaat savaatilinnut ikummatissaq pingaarnermik. Akit maannakkut qaffannerisigut naggorissaatit 70 % -mik qaffarujussuarput ukiut ataatsip ingerlanerani aamma karrit 100%-mik qaffapput, taama aamma oqarpoq savaatilinnut siunnersortaaneq Kenneth Høegh aamma oqarpoq savaatillit ilungersunartorsiornerulissasut. Aamma toqoraaviup akinik isumaqatigiissuteqarnissaa utaqqimaartariaqarpoq uuliap akitsorujussuarneratigut akit allanngortussammata. Nunalerinerup aningaasaqarnera aningaasalersorneqarneralu qulequtaralugit Narsami ataatsimiititsinermi Kenneth Høeh –p oqaloqatiginerani naggataagut qalleqqissarpaa savaateqarnermik ingerlatsiniarneq ilungersunartorsiornerulissasoq.