Uuliap akianut tapit marloriaatingajammik qaffanneqalerput

Uuliap akianut, aamma nunat allat aningaasaasa nikerartarnerannut, tapit, septembarip ulluisa aallaqqaataat aallarnerfigalugu marloriaatingajammik qaffanneqassapput, 5,5 procentimiit 9 procentimut.

Qaffaaneq pingaartumik Royal Arctic Linep nunatsinniit Danmarkimut utimullu assartuinermi akigititaanut sunniuteqassaaq.

Namminersornerullutik Oqartussat akinik aalajangersaasarput, uulialli akia siornaalli qaffakkiartuinnarmat uuliap akianut aamma nunat allat aningaasaasa nikerartarnerannut tapit atuutilersinneqarput, ukiumullu marloriarluni naatsorsorneqartarput.

- Amerikamiut aningaasaat, US dollarit, nalingi apparsimagaluartut, uuliap akia qaffakkaluttuinnarsimavoq. Tamannalu tunngavigalugu nassiussat akiinik qaffaanissaq pisariaqarsimasoq, aningaasaqarnermut pisortaagallartoq Anne Lise Kappel, oqarpoq.

Uuliap akia suli qaffakkiartormat Royal Arctic Linep akinik ajoraluartumik qaffaaqqiittariaqarsinnaanera ilanngullugu ilimasaarutigaa.

Tapit, septembarip aallaqqaataa aallarnerfigalugu, iluarsiivigineqarnissaat, Ineqarnermut, Attaveqarnermut, Avatangiisinullu naalakkersuisoqarfiup akuereereerpaat.