Uuliap akia liiterimut 2 koruuninik qaffassinnaavoq
Nunatsinni aningaasarsiorneq pillugu ministeriunermut siunnersuisartut Katuami ippassaq paasiniaaqatigiissitsimmata taama naliliipput.
Uuliap akia 2 koruuninik qaffassappat Kalaallit Nunaat aningaasaqarniarnikkut ajornartorsiulersinnaavoq, siunnersuisartut siulittaasuat Christen Sørensen oqarpoq:
- Ataatsimut isigissaagaanni isumaqarpoq Kalaallit Nunaat aningaasaqarniarnikkut ajornartorsiulissasoq. Nioqqutissammi eqqussorneqartut akitsorpata, avammullu tunisat nalingat taamaaginnarpat Kalaallit Nunaata isertitai annikinnerulissapput, Christen Sørensen oqarpoq, nangipporlu:
- Aningaasaqarniarnermi nunarsuarmi pisut sunniuteqarfigisinnaanngilagut, namminerli iliuuseqarnerusariaqarpugut, sulisullu inuussutissarsiutinut allanut siunissaqarluartunut akissarsiagissaarfiusunullu nussortariaqassallugit. Kalaallit Nunaat periarfissarissaarpoq, aatsitassarsiornermi aluminiumillu aatsitsiviliortoqarnissaa ilimanarsinnaammat, Christen Sørensen naggasiivoq.
Uuliap 2010-mi akitsorujussuarsinnaanissaa sillimaffiginiarlugu aappaagu annertunngikkaluamik qaffanneqarsinnaanissaa periarfissaasoq ministeriunermut siunnersuisartut innersuussutigaat. Siunnersuut tamanna malinneqassanersoq tassuugu nalunaaqutaq qulinut paasinarsiumaarpoq, aappagumummi aninagasanut inatsisissamut siunnersuut Aningaasaqarnermut naalakkersuisumit Aleqa Hammondimit saqqummiunneqarumaarpoq.
