Kalaallit Nunaat tamakkerlugu aqaguminngaanniit atuutilersussamik nioqqutissiat uuliamik akullit akii appartinneqassapput.
KNI A/S aamma Polaroil taama ilisimatitsipput.
Apriilip ulluisa aappaannit atuutilersussamik solaarip, petroleumip aamma benzin-ip akii liiterimut 9 oorimik appartinneqassapput, KNI A/S-imi pisortaq Lars Møller Sørensen oqarpoq.
- Siunissaq ungasinnerusoq eqqarsaatigalugu nioqqutissiat uuliamik akullit pisiarisarpagut, akiilu allanngorartinnaveersaartarlutigit. Niuffaffinni uuliap akia qaffakkiartoraluarpat taamaaliorsinnaavugut, Lars Møller Sørensen radioaviisimut oqarpoq.
Taanna aamma oqarpoq maanna akigitinneqartut ukioq naallugu atuutsinneqarumaartut.
Benzin-i liiterimut 3 koruunit 77 oorinillu akeqalissaaq.
