Uuliasiortoqalerpat aningaasat iluanaarutaalerumaartussat aningaasaateqarfimmut nakkartinneqartassasut, Siumut sapaatip akunnerata naanerani isumasioqatigeereerluni taama siunniussaqarpoq.
Folketingimi ilaasortaq Siumumeersoq Lars-Emil Johansen:
- Takorluukkersaarutaannaanngilaq oqassalluni, ukiut qulit qaangiuppata nunatta uuliamik tunisassiorluni aallartereersimanissaa. Taamanikkussamullu aningaasat isaatinneqartussat tamarmik aningaasaateqarfimmut nakkartinneqartassasut, Siumuminngaanniit siunnersuutigaarput, Lars-Emil Johansen oqarpoq.
- Aningaasat siunissamut sillimmatissatut ukiumoortumillu aningaasaliissutinik ikiliartuaartitsinermut atorneqassasut siunnersuutigaarput. Nunatta siunissami imminut aningaasalersornissaa nassaaraaput. Uuliaqarpat, uuliap akia atorlugu namminersulissaagut, Lars-Emil Johansen erseqqissaavoq.