Apeqqutit tamakkua Aatsitassanut Ikummatissanullu Pisortaqarfimmit misissuinissamut pilersaarutinik nassuiaammik saqqummersitsinikkut akissutissarsiorneqarput. Quppersagaq aalisartunut umiartortunullu allanut umiarsuarnik misissuisunik naammattuuisartunut naatsorsuussaavoq.
Ilaatigut sajuppillatsitsisarluni misissuinerit qanoq ingerlanneqartarnerannik paasissutissinneqassapput. Tamatumani pineqarlutik nipit sakkortuut immap naqqanut ingerlatinneqartartut uterteqqinneqartartullu. Nipit utertinneqaraangata immap naqqata sananeqaataa soqarnersorlu paasisaqarfigineqartarput.
Quppersakkami ilaatigut atuarneqarsinnaapput nipit sakkortuut aalisakkanut uumasunullu allanut imarmiunut ajoqutaasartut, taamaattumillu piaqqiornerisa nalaani sajuppillatsitsisarluni misissuinerit ingerlanneqarneq ajortut. Soorluttaaq nipit sallaatsunnguamik aallarteriarluni minutsit 20-t ingerlanerini sakkortusiartortinneqartartut, taamaalillutik immami uumasut nipit nuanniitsut nipittorpallaartinnagit qimaasinnaaniassammata.
Quppersagaq uuliamik ujaasinermut tunngasunik allarpassuarnik imaqarpoq, kalaallisut qallunaatullu saqqummersinneqarluni. Aatsitassanut Ikummatissanullu Pisortaqarfimmut saaffiginninnikkut pissarsiarineqarsinnaavoq.