Uuliamik nioqqutissiortut nuannaarput
Harper nammineerluni nunap immikkoortuani aamma uuliaqarfiusumiit Albertamiit kingoqqisuuvoq, taamaalillunilu kitaani issittumilu uuliamik gassimillu tunisassiornerup ineriartornissaanut soqutiginnittorujussuulluni. Issittumiit uuliamik gassimillu pinngortitameersumik, umiarsuarnik assartuisalernissamut naalakkersuinikkut partiit allat akerliunerminnik ersersitsisimagaluartut, suliffissuaqarfiit ministeriunermiit tamakkiisumik tapersersorneqannguatsiarput.
Issittumi uuliamik gassimillu suliffissuaqarfiit ineriartortinneqarnerunissaat aammattaaq ersarilluinnartumik paatsuugassaanngitsumillu Canadap Issittumi oqartussaassuseqarnera Harperip anguniagaanut naleqqulluinnarpoq. Taassuma issittoq aasat tamaasa ornitttarpaa, Canadallu ilaani tamaani Canada akuersisimatinnagu suliffissualiornissanut avataaniillu sanaartornerit allat ingerlanneqarnavianngitsut tikeraarnini tamaasa naqissusertarpaa.
Aammattaaq ilisimatusarnikkut aningasaliissutit Canadap naalakkersuisuinit issittumi killeqarfiit eqqoqqissaartumik nalunaarsorneqarnissaannut atugassat imaaginnavipput. Tartupaluk pillugu aaqqiagiinngissut kisiartaanngilluinnarpoq, aammattaaq killeqarfiit oqartussaasuseqarnissarlu pillugit Canada Ruslandimut USA-mullu annertuumik akersuuppoq. Tamarmilli pingaarnersarigunarpaat Sullualuk pillugu aaqqiagiinngissut. Canada isumaqarpoq apeqquserneqarsinnaanngitsumik tamanna Canadap imartarigaa. Akerlianik USA allallu isumaqarput Sullualuk tassaasariaqartoq nunat tamalaat imartaat kikkunnilluunniit atorneqarsinnaasoq.
Qinersinermi naammasseqqammersumi amerlanerussuteqalernini Stephen Harperip tunuliaqutaralugu uuliasiornerunissamik gassisiornerulernissamillu pilersaarutini naammassiniarsinnaanngorpai taamaalillunilu issittup ilarujussuani Canadap oqartussaassuseqarnerata sorsuutiginera nangissinnaanngorlugu.