Uuliamik nassaarput

Qeqertarsuup kitaani qillerinerit inerneri uissuuminartut uuliasioqatigiiffiup Cairn Energyp nalunaarutigaa.

Imartami qillerivimmi, Alpha-mik taagukkami, uuliamik nassaartoqarnera Cairn Energyp nalunaarutigaa. Immap naqqani 400 meterisut itissulimmi innermik anitsiffiusup nalaaneersumi immikkoortumi issusuumi uulia nassaarineqarpoq.

Qillerivimmit qaqitat misissuisarfinni misissukkat arlallit takutippaat, uuliat assigiinngitsut marluk tamaani nassaassaasut, tassa uuliat piffissaq pinngorfigisimasaat aammalu sananeqaataat assigiinngitsuusut.

Ukioq manna qillerinerni uulia nassaarineqartoq siullersaavoq. Uuliasiorluni qillerivik Stena Don, qilleriffimmi Alphamiittoq immami Qeqertarsuup avataaniippoq.

Uuliat assigiinngitsut sananeqaataat paasilluarumallugu maannakkorpiaq misissueqqissaarnernik ingerlatsisoqaleruttorpoq, Aatsitassanut Naalakkersuisoq, Ove Karl Berthelsen ullaap tungaa nalunaarpoq.

Taassuma ilanngullugu aamma oqaatigaa qillerinerit allat pilersaarutaareersutut ingerlanneqassasut.

- Uuliasiorluni qillerinerni angusaq qiimmaallannartoq alla aammatusarliunneqaqqippoq. Maannamut angusaasut tamaani uuliaqarsinnaaneranik ilimatsaassanik uppernarnerulersitsipput, Ove Karl Berthelsen allappoq.

Cairn Energy-p pisortaanera Bill Gammel Politikenimut ima oqarpoq:

- Imartami Siggu-blokkemik taasami eqqaanilu uuliasiorfitsinni taama siusitsigisukkut uuliamik nassaarneq assut qiimmaallannarpoq.

Aggusti qiteqquttoq Cairn Energy nalunaarpoq, sumiiffinni qilleriffiusumi T8-mi gasitalinnik nassaartoqartoq, taamaalilluni sumiiffit qilleriffiusut tamarmik kulbrintitalinnik nassaarfiupput.