Uuliamik mingutsitsineq ullut marluk malugisimanngilaat

Station Nord, tunup avannaaniittoq orsussamik nuussiviginiarneqarnerani  apriilip aallaqaataani sillimaniarnikkut ajortoortoqarpoq. Tassa timmisartumut  orsussaq 22.000-it  liiteritut
annertutigisoq anianermigut mingutsitsimmat.

Station Nordimi Tunup Avannaaniittumi tankit ulikkaaqqareersut orserniarnerini uuliamik aniasoortoqarsimasoq, Kangilinnguit sakkutooqarfiani sakkutuut allaffianni pisortap Jan Bøgstedip oqaatigaa.

Orsussamik 22.000 literitut annertutigisumik tankip eqqaani mingutsitsineq apriilip aallaqqaataani pivoq, timmisartup Thule Air Baseminngaanneersup orsussamik tankimut nuussiniarnerani pisimalluni.

Tankillu misissorneqarnerisigut pisoq apriilip pingajuaanni aatsaat paasineqarsimavoq.

Jan Bøgsted isumaqarpoq sapaatip akunnerata naanerani silap ajornera ajutoornerup kingusissukkut paasineqarneranut pissutaasinnaasoq.

-Station Nordimi pisup nalaani 20-t30-llu missaani isitsigisimavoq, anorlingaatsiarsimavoq, taamaattumillu tankit nakkutiginiarneri ajornakusoorsimalluni, Jan Bøgsted oqarpoq.

Jan Bøgstedip ilanngullugu oqaatigaa tappavani sulisut massakkut saliisut, kiisalu ikiuuttussanik tikittoqarumaartoq.

Uuliap apummit millugunneqarsimanissaa Illersornissaqarfimmiit ilimagineqarpoq, aputillu aannginnerani, tassa maajip qeqqata missaa nallertinnagu, aputaajaanikkut mingutsitsineq piiarneqarsinnaasoq naatsorsuutigineqarpoq.

Station Nordimi mingutitsinernut annikinnerusunut taamaallaat atortoqarneq pillugu atortussanik tikisitsisoqassasoq Jan Børgstedip ilanngullugu oqaatigaa.

- Ajutoorneq sumik tunngaveqartoq ilisimanngilarput. Taamaattumik ajutoornerup sumik pissuteqarnera paasiniarlugu maanna misissuisoqaleruttorpoq, Jan Bøgsted oqarpoq.

Minngutsitsinerup salinnissaa Illersornissaqarfiup illuutinik ingerlatsiviata akisussaaffigaa.
Uuliamik mingutsitsinerup saliinerullu kinguneriumaagai aggustimi sila atorsarorneruppat nalilersuiffigineqassapput.