Uuliamik mingutsitsigallassapput

Alaskami uuliasiorfissuaq BP aalajangerpoq, uuliap nassaajusup aqqutai, ruujorersuit manngertornisismaqisut matuneqassanngitsut, Associated Press taama allappoq.

Uuliasiorfik sapaatip akunnerani kingullermi nalunaaraluarpoq, Prudhoe Bay-ip nalaani uuliasiorneq unitsinneqassasoq.

Uulia aqqutigalugu akileraatutitigut Alaskami aningaasanik isaatinneqartartut pinngitsoorneqarsinnaanngillat, aningaasanillu Alaskami isaatinneqartartut 90 procentii uuliasiornermeersuullutik. Taamaammat Alaskami isertitanut akileraaruteqaranilu momseqanngilaq.

Alaskami guvernøri aamma BP-mut siorasaarisimavoq, uuliasiorneq aallarteqqinneqanngippat BP aningaasarpassuarnik taarsiitinneqassasoq.

Alaskap avannaarsuani masarsummi, ataa qeriuaannartumi, uuliamik ukiup aallartilaarnerani mingutsitsisoqalermat paasineqarpoq, ruujorit uuliap aqqutigisaasa ilarujussui manngertornisimasut.

Aappaagu marsip qaammataani ruujorit iluarsartuunneqarnerisa naammassineqarnissaat ilimagineqarpoq.