Uuliamik isumaqatigiissut Dansk Folkepartiip unitsinniarpaa

Namminersorneq pillugu Isumalioqatigiissitamut innuttaasut akerliulernissaat Dansk Folkepartiip anguniarsaraa, Isumalioqatigiissitap immap naqqa tassanilu uuliaqarfiit Kalaallit Nunaannut tunniunniarpaat, uuliamik qalluineq sinneqartooruteqartalerpat Danmarkip ataatsimoortumik tapiissutaasa ikilisikkiartorneqassallutik.

Uuliamik qalluisoqalerpat isertitanit 75 millioni koruunit siulliit isumaqatigiissut malillugu Kalaallit Nunaata pissavai, taamalu pisoqareerpat isertitat affaat ataatsimoortumik tapiissutinut ilangaatigineqartalissaaq. Isertitallu ima annertututigilissappata ataatsimoortumik tapiissutit pisariaarullutik, taava nutaamik isumaqatigiissusiortoqassaaq.

Isumaqatigiissutip taassuma Danmark uukapaatissagaa Dansk Folkepartiimi gruppip siulittaasua, Kristian Thulesen Dahl, isumaqarpoq, kalaallillu aningaaserivimmut aqqutaa tamaat illassallutik.

-Takorlooriaruk Kalaallit Nunaanni immap naqqani ukiut 20-t qaangiuppata amerikamiut ilisimatuut oqarnerattut uuliaqartigissasoq. Immaqa uulia nunarsuarmi annertunerpaaq. Uulia nunamiit tissalulissaaq, taava uagut ukiuni 20-ni 64 milliardi koruuninik tunisimasavavut, kalaallillu taamanikkussamut oqaannassapput: Qujanaq 64 milliardi koruuninut, maanna sussariunnaarpassi, Kristian Thulesen Dahl oqarpoq.

Kristian Thulesen Dahlip kalaallit qinigassinniarpai.

-Nassuerutigisariaqarpaat namminersulivinnissaq anguniarlugu, uuliaqarujussuassappallu Danmark avitseqatigerusunngilaat. Taava ilimagisariaqanngilaat uatsinniit aningaasanik ullumikkutuut piuarnissartik, namminnerlu tunniussiumanatik. Imaluunniit naalagaaffeqatigiinnermut ilaaginnarusussapput, aamma pisoorsuangoraluarunilluunniit, Kristian Thulesen Dahl oqarpoq.

Kalaallit Nunaata namminersulivinnissaq qinissappagu, ataatsimoortumik tapisiat allanngortinneqarnissaat Kristian Thulesen Dahlip maannangaaq anguniarusuppaa.

Danmarkimi innuttaasut akerliulernissaat taassuma aamma neriuutigaa.