Uuliamik assartuut ikkarlippoq

Umiarsuaq uuliamik assartuut Oratank Polar Oilimit attartugaasoq Aasiaat eqqaanni unnuaq ikkarlippoq. Umiarsuaq taanna benzinamik, uuliamik kinertumik gasimillu useqartoq nammineq ikkarlummit kaanngarsinnaasimavoq. Politiit nalunaarput uuliamik maqisoqanngitsoq.

- Umiarsuup inuttai aqqanillit tamarmik ajunngillat. Umiarsuaq putusimavoq kisianni orsussamik aniasoqanngilaq, unnerluussisuuneq Maja Schiøtz politimestereqarfimmiit nalunaarpoq.

Umiarsuaatillit aamma eqqissiallapput umiarsuaq nammineerluni kaanngarsinnaasimammat.

- Nalunaaqutaq 03.22 umiarsuaq umiarsualivimmut tulannissaminut piareersarpoq taamaasineralu innaallagissamut atortut allanngortiterneqarlutik. Taamatut sulinermi umiarsuaq sivikitsumik sarfaarukkaaluarpoq taamalu aqunneqarsinnaajunnaarallarluni. Tamanna ikkarlinnermut pissutaavoq. Ikkarlinnermi inunnik ajoquseqartoqanngilaq aammalu mingutsitsisoqarneranik malunnartoqarani, umiarsuarmik piginnittut MH Simonsen sinnerlugit Lars H. Simonsen nalunaarpoq.

Umiarsuaq immappoq taamaattoq imaarsaatai angummasinnaallutik. Politiit nalunaarput umiarsuup kivinissaa ilimananngitsoq. Umiarsuaq maanna Aasianni kisaqqavoq.

Umiarsuaq qaleriinnik ameqarpoq sikusiornissamut immikkut qajannaallisagaalluni. Aqqartartut umiarsuaq maanna misissoqqissaarpaat.