Uulia tammaasaq sumiiffissarsivaat

Grønlands Kommando-p kiisami paasigunarpaa timmisartunut orsussaaq 11.000 liiterit missaanniittoq sumut pisimanersoq.

Pineqartoq tassaavoq timmisartunut orsussaq nunatta avannaarsuani Station Nordimi ukioq periarfeerunneqartoq.

Maanna aasariarmat tankersuit misissorluarneqarsinnaanngorsimapput, misissuinermilu paasineqarpoq ruujorit ilaanni putoqartoq, taama orlogskaptajn Alex Jensen Kangilinnguanit ilisimatitsivoq.

Station Nordimi ruujorit nutaanngilisimaqaat, aammami nunarsuup avannaarpiarsuata silaannaanut allanngorujussuartartumut naleqquttussiaasimannginnamik.

- Aalajangiupparput ruujorit tamavimmik taarsersorneqarnissaat, orlogskaptajni ilisimatitsivoq.

Misissuinermi mingutsitsisoqarsimaneranik malunnartorsisoqanngilaq, taamaattumik orsussaq kuuttoorsimasoq aalannguussimassangatinneqarpoq.

Orsussaq nalinginnaasumit oqinnerugami nunamut qeriuaannartumut sitserussimasinnaanngilaq.

Timmisartup orsussaa 11.000 literi periarfeerunneqarpoq Station Nordimi tankersuarmik marsi qaammataa naalersoq immiisoqarniartillugu.