Uulia suli akitsoriartorpoq
Uuliap akiata qanittukkut appariartulernissaa uuliaarniat akitsuiartuinnarnerisa ilimanarunnaarsippaat. Qanittukkut Saudi-Arabia uuliap akiata appartikkiartulernissaa pillugu ataatsimeersuartitsigaluarpoq. Ataatsimeersuarneq aallartimmat uulia nappartamut 140 dollari inorlugu akeqaraluartoq sapaatip akunnerata ingerlanerani qaffariartuinarluni maanna tassa 142 dollareqalerpoq. Ataatsimeersuarnermi ministeriunerit kattuffissuillu sinniisuinit peqataaffigineqartumi, Saudi-Arabiap nalunaarutigigaluarpaa namminneq ullormut nappartat 9,7 milliuunit qallortarlugit sulilu qallukkatik annertusiartortinniarlugit. Naak oqaluttuarisaanermi aatsaat uulia taama annertutigisoq qallorneqaleraluartoq, akit appariartornerannik tamanna kinguneqanngilaq. Saudi-Arabia naalagaaffiillu OPEC-imut, tassa uuliaarniat kattuffiannut ilaasortat uuliap akitsoriartorneranut pisuujumanngillat, iluanaarniapiluttulli dollarip nalikinnera atorluarniarsaralugu iluanaarniapiluttut pisuunerarlugit.
