Uulia isaatitsissutaalissappat naalagaaffiup tapiissutaanit ilanngaasoqassaaq

Kalaallit Nunatsinni uuliasiorneq aningaasarsiutaallualerpat iluanaarutit Kalaallit Nunaannuinnaq ilaqutinngussasut Jørgen Wæver Johansen DR2-mi ippassaq apersorneqarluni ilaatigut oqarpoq. Tamanna danskit inatsisartuisa ilaannit isumaqatigineqanngilaq.

Jørgen Wæver Johansen oqarpoq: - Aap, taamaassaaq, Kalaallit Nunaanni naalakkersuinermik suliaqartoq kinaluunniit aperigukku assigiikannersumik akissutisissaatit, tassalu aningaasartuutissat isertitassallu soorunami Kalaallit Nunaannit isumagineqassapput isertinneqarlutillu.

Tamannali danskinit naalakkersuinikkut suliaqartunit illuatungilerneqarpoq. Per Ørum Jørgensen, Konservative Folkepartimeersoq, namminersulivinnissamut ataatsimiititaliarsuarmut ilaasortaq oqarpoq:

-Naalagaaffiup Kalaallit Nunaannut tapiissuteqartarnera ajoqutissartaqartinngivippara, kisianni koruuninik amerlasuunik isaatitsisoqalissagaluarpat soorunami tapiissutinik ilanngaasoqartariaqarpoq, soorlu aamma Savalimmiunut taamaaliortugut. Folketingimi ilaasortat partiinit assigiinngitsuneersut ataatsimut nipeqakannerlutik oqaatigaat, kalaallit uuliasiornermit isertitaqalissagaluarpata soorunami tapiissutinit ilanngaasoqassasoq.