Uulia imminut akilersinnaassasoq ilimanarnerarpaa

DTU-mi, tassalu Danmarks Tekniske Universitet-mi pisortaq, Erling Halfdan Stenby, aviisimut Politikenimut, Cairn Energyp uulianik assigiinngitsunik marlunnik nassaarnermi kingorna nalunaaruteqareersullu ima oqarpoq:

- Nassaarnerup ilimanarnerulersippaa uulia qallorneqaruni aningaasarsiutaalluarsinnaasoq, Erling Halfdan Stenmby oqarpoq.

Uuliat assigiinngitsut marluusut nassaarineqarnerat, Erling Halfdan Stenby-p maluginiarpaa, aammalu qilleriffinni isorartuuni nassaarineqarsimaneri maluginiarlugu.

- Uuliaqarferujussuit marluk nassaarineqarput taakkulu pinngorfiat assigiinngitsuulluni, tassalu ima paasisariaqarluni minnerpaamiik aningaasarsiorfiusinnaasut marluk nassaarineqartut, Erling Halfdan Stenmby oqarpoq nangillunilu:

- Tamannali aatsaat uppernarsineqarsinnaavoq misiliilluni tunisassiornerup kingorna, Stenby oqarpoq.

Taanna aamma naliliivoq, nassaartut qalluinissaminnut qiimmaallaatigissaqigaat aammalu neriulluassaqaisut.

- Uuliaqarferujussuaqartoq uppernarsineqarpoq, tamannalu nutaarsiassaavoq nuannersoq, aviisimut Politikenimut Erling Halfdan Stenby oqarpoq.