Uukkartut eqqaani imaani sisorarput

Imaani malissuarni surfertartut Hawaiimeersut Alaskap avannaani Cordovap eqqaani, Sermersuup ukkartarfiata nalaani maliliorfiusartumi, imaani sisorarneq misilissimavaat.

Hawaiimiut surfertartut Garrett McNamara aamma Kealii Mamala, Cordovap eqqaani Copper Riverimi maskiinaaralinnik sisoraaserlutik sermersuup eqqaani uukkarnerani malissualiortumi sisorarneq misilikkamikku oqaluttuarput aatsaat taama pissanganartigisumik misigisaqarlutik.

- Aatsaat taama misigisamik pissanganartigisumik naammatuugaqarpunga. Ulloq siulleq malissuarni sisoraqqaaratta, misiliinermi siullermi angerlaannaleraluarpunga, Mc Namara oqaluttuarpoq.

- Sermersuup uukkalersup saavani utaqqilluni pissanganartaqaaq, sermersuarlu uukkaleraangat anigorneqarsinnaanersoq nalunartarpoq, taamaammallu pissanganartaqaluni, Kealii Mamala oqaluttuarpoq.

Hawaiimiut surfertartut tamarmik oqarput, Alaskami sermersuup eqqaani ukkartoqartillugu malissuit portuallaanngikkaluartut pissanganartorsiorfigineqarluarsinnaasut. Taama Siku News allappoq.