Utoqqatsertoqartariaqarnerarpaat

Filmi "Eksperimentet" nunarsuaq tamakkerlugu arfininngormat takuteqqaarneqarpoq, takutitseqqaarneq Nuummi Katuami pilluni. Filmi isiginnaarianit tigulluarneqaqaaq, tamannalu ippassaq unnukkut tusarnaarlugulu oqaluttuaraarput.

Filmi takutinneqareermat oqallittoqarpoq, qangalilu oqallisaasarsimaqisoq, sulilu saqqumilaartoq, tassani saqqummeqqippoq:

- Filmi takoreerlugu uanga isumaqarpunga, filmip oqaluttuassartaa piinnarnagu, aatsaallimi ilumut, kikkulluunniit kukkujuitsuunngimmata, aamma kukkuneq nassuerutigisinnaagaanni, inuunermi kusanarnerpaammat, isumaqarpunga Danmarki pissutissaqarluaraluartoq utoqqatsissalluni - meeqqanut taakkununnga pineqartunut, taavalu aamma inuiaqatigiinnut kalaallinut - utoqqatsissutissap pissutissaqarluarnera uppernarsineqarpoq.

- Aap, isiginnaartut ilaat oqallittoqarnerani ilaatigut oqarpoq.

Meeqqat ilaat, taamanikkut Danmarkiliartitaasunut ilaasimasoq, Helene Thiesen, isumaqataalluinnarpoq. Oqallittunut akuuvoq, paasisinnaanngilaalu Danmarkimit suli utoqqatsertoqanngimmat. Taassuma oqaasii Stephen Heilmannimit kalaallisuunngortinneqarput:

- Tassa aamma uanga utoqqatsertoqarumaarnissaa pisariaqarsorigaluarpara - uagutsinnut, taama pineqarsimasunut. Aamma aperisoqarsinnaavoq sooq'una utoqqatsernianngitsut?

"Utoqqatserusuppisi? Naalagaaffik immaqa taama aperineqarsinnaavoq!

Naalakkersuisut siulittaasuat, Kuupik Kleist, oqallinnermi aamma peqataavoq, taannalu isumaqarpoq Kalaallit Nunaata Danmarkillu saammaateqatigiinnissaat pisariaqalersoq.

Suleqaterput Mikkel Bjarnø Lund, filmi takutinneqaqqaarmat peqataavoq.