Utoqqatsertoqarnera nuannaarutigaat

Oqartussat qimminik toqaraasimanerannut suliassami kiisami utoqqatsertoqarlunilu taarsiissuteqartoqarnialernera Nunavimmi nuannaarutigineqaqaaq.
Allattoq Gedion Storch
aggustip 22-at 2011 10:44

Nunavimmi 1950-kkunni 1960-kkunnilu qimmit inunnit naggueqatigiinnit pigineqartut politiinit toqararneqarput. Qimminik toqoraaneq piginnittunut siumut nalunaarutigineqanngilaq.

Politiinit oqaatigineqarsimavoq qimmit meeqqanik marlunnik saassussisimanerat pissutigalugu sillimaniarnissaq eqqarsaatigalugu taamaaliortariaqarsimallutik.

Ilaqutariit ataatsit quliniit 15-inut amerlassusilinnik qimmeqarsimapput taamaattumillu qimmit uani eqqartorneqartut 300-t sinneqarsimapput.

Taamaliortoqarnerata kinguneranik ilaqutariiaat kaannermik nalaanneqarput, tassami piniariarsinnaajunnaarnertik pissutigalugu ajornartorsiuleramik. Lucy Grey, Makivik sinnerlugu suliamik ingerlatsisuusoq Radioaviisimut ima oqarpoq:

- Ilumoorpoq qimmit meeqqanik marlunnik saassussinerup kingorna toqorarneqarmata, soorunami tamanna pitsaasuunngilaq, kisiannili eqqarsaatigineqartariaqarpoq naggueqatigiit Inuit kaannermik nalaanneqarmata allaallumi toqusoqarsimalluni tamatumalu kingorna ajutoorneerpassuit ajunaarnerillu pisimapput, qamuteralaat atugaalernerannik pissuteqartumik. Qimminimmi atuineq pitsanerujussuugaluarpoq, Lucy Grey oqarpoq.

Qimmit pillugit suliassaq ukiorpassuarni uninngatinneqarsimavoq, sapaatilli akunnerani kingullermi, nunap immikoortortaani Quebec-imi naalakkersuisut siulittaasuat, Jean Charest qimmit toqorarneqarnerat pillugu utoqqatserpoq ilutigitillugulu suliniaqatigiiffimmut Makivimmut, Nunavimmik sullissisuusumut 15 millionit koruuninik taarsiissuteqarluni.

Lucy Greyip Radioaviisimut ilanngullugu oqaluttuaraa, aningaasat qimmit piginnittuinut tunniunneqarnavianngitsut tassami piginnittut amerlanerpaat toqoreernikuummata, akerlianilli Nunavimmi naggueqatigiit Inuit oqaasiisa kulturiatalu pigiinnarneqarnissaat pillugit suliniutinut atorneqassasut.