Utoqqarnut suliniut ajugaanniuteqataassaaq
Suliniut 040, 2008-mit 2010-mut Skotlandimit, Irlandimit, Sverigemit, Finlandimit Nunatsinnillu suleqatigiissutigineqarpoq.
Utoqqaat inuunerisa naleqassusiat pitsaassusiallu suliniummi pineqarpoq, utoqqaat taamaalillutik peqqissuuginnarnissaat aamma sapinngisamik sivisunerpaamik nammineq angerlarsimaffimminni najugaqaannarnissaat anguniagaallutik.
Utoqqaat imminnut ikioqatigiinnissaannut qanoq ikiorneqarsinnaanersut misissorneqartunut ilaavoq. Nunatsinni illoqarfinni Nuummi, Tasiilami, Paamiuni, Illoqqortoormiuni aamma nunaqarfinni Arsummi, Kuummiuni, Kulusummi aamma Qeqertarsuatsiaani misissuisoqarpoq.
Nunat immikkoortuisa ineriartortinneqarnerisa iluanni suliniutinik pitsaasunik nassaarniarnissaq, RegioStars-imut tunngatillugu siunertarineqarpoq. Tamatumani suliniutit immikkuullarissut nutaaliornerusullu, nunat immikkoortuinut allanut pilerinarsinnaasut isumassarsiorfiusinnaasullu pineqarlutik.
Suliniutit 107-it nersornaasigassatut innersuussutigineqarput, taakkunannga 24-t nersornaaserneqarnissamut unammisussatut toqqarneqarlutik. Taakkununngalu Nunatsinni suliniut tassa ilaavoq.
RegioStarsimi nersornaaserneqartussaq Bruxelles-imi ataatsimeersuartoqarnerani juunip 14-ianni tunniunneqassaaq.